1Ntɛ Yesu owur kəlɔ kəpɔŋ ka Kanu disrɛ mɔ, kɔ wəcɛpsɛ kɔn darəŋ wəkin oloku kɔ: «Wətəksɛ, məmɔmən masar mɛpat mɔtɔt, məmɔmən wɔlɔ wəpɔŋ wa kəlɔ kəpɔŋ ka Kanu!»
2Kɔ Yesu oloku kɔ: «Məŋnəŋk wɔlɔ wɔpɔŋ wawɛ! Tasar pɔfɔdedeŋsɛ pɔlɔm kəroŋ, andewuŋ mi fəp.»
3Ntɛ Yesu ɛndɛ nde tɔrɔ ta tɔk ya Olif pətɛfərnɛ kəlɔ kəpɔŋ ka Kanu mɔ, Piyɛr, Sak, Isaŋ kɔ Andəre ŋayɛfɛ kəyifət kɔ ŋabɔkərɛ:
4«Məloku su ake tɛm tɔ tatɔkɔ tendeyi-ɛ? Tɛgbɛkərɛ tere tendementər kəlarɛ ka mes mamɛ məloku mɔ fəp-ɛ?»
5Kɔ Yesu ɛyɛfɛ kəloku ŋa: «Nəkɛmbərnɛ ta fum o fum pəsɔŋɛ nu kəsɔlɛ.
6Afum alarəm ŋandeder ŋacwernɛ tewe tem, ŋaclok'un: ‹In'ɔfɔ, wəsom ka Kanu!› Ŋandesɔŋɛ kənay ka afum alarəm kəsɔlɛ.
7Kɔ nəndene pacloku teta kəwan kɔ pəyɔnɛ fɛ ti, pacfor teta ki-ɛ, ta nənesɛ! Pəmar tatɔkɔ teder, mba tɔfɔdeyɔnɛ kərɛsna kəlip ka doru de.
8Bawo afum a atɔf ŋɔlɔma ŋandeyɛfərɛnɛ kɔ afum a atɔf ŋocuru, dɛbɛ dɛyɛfərɛnɛ kɔ dɛbɛ. Antɔf ŋendeyikcɛ mofo mɔlɔma, dor dendeyi. Mes mamɔkɔ mɛndəŋk kələpsər ka doru mɔ, meyi pəmɔ pucuy pa wəran mpɛ pɛndəŋk kəkom mɔ.
9Nəkɛmbərnɛ nənasərka ntɛ tɛntam kəbəp nu mɔ. Andekekərɛ nu dəŋkiti d'aSuyif, andesut nu dəkətola Kanu da aSuyif dɛlarəm. Nəndeloku tɔkɔ nəncərɛ tetem mɔ akiriŋ a sədare səpɔŋ kɔ abɛ a tɔf alɔma fɔr kiriŋ.
10Mɛnɛ padəŋkər kərɛsna Kibaru Kətɔt afum a tɔf ya doru fəp.
11K'andekekərɛ nu kəkɔbɛr ŋa dəwaca-ɛ, ta nənesɛ tɔkɔ nəŋkɔloku mɔ, mba nəloku tɔkɔ aŋkɔsɔŋ nu gbəncana babɔkɔ mɔ, bawo bafɔ nən'endekɔlok-loku, mba Amera Ŋecempi ŋa Kanu.
12Wɛnc wendesɔŋ wɛnc kədif, kas kəsɔŋ wan kɔn, awut ŋandecəmɛ akombəra aŋan dɛbəkəc, ŋasɔŋ ŋa kədif.
13Fəp fəndeter nu teta tewe tem, mba nwɛ endebəknɛ haŋ telip mɔ, andeyac kɔ.»
14«Kɔ nəndenəŋk pəyikyik pɛləsər pəpɔŋ mpɛ Mariki enter mɔ,13.14 Daniyel 9.27; 11.31; 12.11 pɛndɛ nnɔ pəntɔmar pi kəyi mɔ, a afum akɔ ŋandeyi Yude mɔ pəmar ŋayɛksɛ ŋapɛ mɔrɔ kəroŋ. Pəmar wəkaraŋ ka buk bambɛ pəcərɛ tantɛ.
15Nwɛ eŋyi dabaŋka mɔ, ta pəbɛrɛ kəlɔ kɔn disrɛ kəkɔlɛk paka.
16Nwɛ eŋyi dalɛ mɔ, ta pəluksərnɛ kəkɔlɛk yamos yɔn.
17Pucuy pere pɔ tendeyɔnɛ abɛkəs, kɔ aŋɛ ŋande ŋacmɛsər dɔsɔk dadɔkɔ mɔ!
18Nətola Kanu ta pucuy peder mɔlɔfɛ.
19Bawo mataka mamɔkɔ mɔŋyɔnɛ mataka ma kətɔrəs, nkɛ kəntɔyɔ kəwurɛnɛ kəyɛfɛ ntɛ doru doncop kɔ Kanu kəlompəs di haŋ ndɛkəl mɔ, kətɔrəs nkɛ kəntɔdegbɔkərɛ sɔ kəyi mɔ.
20Mba Mariki pənatɔbelər mataka mamɔkɔ-ɛ, kɔ ali fum anayac fɛ. Mba ɛnabelər mataka mamɔkɔ teta aŋɛ ɛnayɛk-yɛk mɔ.
21Kɔ fum wəlɔma oloku nu: ‹Krist eyi nnɔ,› ‹Eyi nde,› ta nəlaŋ wəkayi.
22Bawo krist ka yem kəla, kɔ sayibɛ sa yem səlarəm səndewur. Si səndesɔŋ mɛgbɛkərɛ kɔ mes mɛwɛy-wɛy ntɛ tɔŋsɔŋɛ a səsɔlɛnɛ afum, kɔ səntam-ɛ, səsɔlɛnɛ sɔ akɔ anayɛk-yɛk mɔ.
23Nəkɛmbərnɛ belbel, isɔŋɛ nu ti kəcərɛ!»
24«Mba mataka mamɔkɔ, kɔ kətɔrəs kaŋkɔ kəncepər-ɛ, pəndeyɔ gbərəp, ŋof ŋɔfɔsɔmar,
25cɔs cəntɛmpɛnɛ dəkɔm, ali ca ya fənɔntər nyɛ yeyi dəkɔm mɔ yendeyikcɛ.13.25 Esayi 13.10; 34.4
26Awa, andenəŋk Wan ka Wərkun pəcder dəkəp kɔ fənɔntər fəlarəm kɔ nɔrɔ dɔn da dəKanu.
27Endesom mɛlɛkɛ dəmɔmpɔmpɔ ma doru fəp kəloŋka ka aŋɛ ɛnayɛk-yɛk mɔ kəyɛfɛ dəkəcop haŋ dəkələpsər da kɔm kɔ antɔf.»
28«Nətəkəs totubcɛnɛ ntɛ kətɔk ka fik kəmentər mɔ: Kɔ wara wa ki wɛncaŋk, wopoŋ bɔpər-ɛ, nəncərɛ a kətəŋ kəlɔtərnɛ.
29Tatɔkɔ tɔ teŋyi kɔ nənəŋk mes mamɔkɔ mecder-ɛ, nəcərɛ a Wan ka Wərkun ɔlɔtərnɛ, eyi dəkəbɛrɛ.
30Kance icloku nu: Dɛtɛmp dandɛ dɔfɔcepər ta mes mamɛ fəp meyi-ɛ.
31Kɔm kɔ antɔf yendesɔlɛ, mba moloku mem mɔfɔdesɔlɛ.»
32«Ntɛ tɔyɔnɛ ta dɔsɔk kɔ pəyɔnɛ fɛ ti ta tɛm mɔ, fum o fum ɛncərɛ fɛ ti, ali mɛlɛkɛ mmɛ meyi dəkɔm mɔ fəp, ali wan, mɛnɛ Papa sona gboŋ ɛcərɛ ti.
33Nəkɛmbərnɛ, ta nədɔŋəs, bawo nəncərɛ fɛ tɛm ntɛ tendeyi mɔ.
34Pəndeyi pəmɔ ntɛ wərkun endekɔ marənt, pəsak kəlɔ kɔn, pəsɔŋ acar ɔn nwɛ o nwɛ yɛbəc yɔn, pəsom wəbum kəkɛmbərnɛ kumba.
35Nəkɛmbərnɛ, bawo nəncərɛ fɛ tɛm ntɛ wəka kəlɔ endeder mɔ: Tɛntam kəyɔnɛ dɔfana, cɛk-cɛkana, dɔsɔkana kɔ pəyɔnɛ fɛ ti-ɛ bətbətana.
36Ta pəder pəbəp nu nəcdirɛ.
37Tantɛ iŋloku nu mɔ, iŋloku ti fəp, nəkɛmbərnɛ!»