1Tɛm tatɔkɔ afum wul wul ŋanaloŋkanɛ, pəwurɛnɛ pəmɔ ŋadeŋsərɛnɛ, kɔ Yesu oloku acɛpsɛ ɔn darəŋ kərɛsna: «Nəkɛmbərnɛ lebin da aFarisi ndɛ dɔyɔnɛ kəbaŋɛnɛ dofum mɔ.
2Tes o tes tɔgbɔpnɛ teyi fɛ ntɛ pəntɔmar paloku mɔ, ntɛ o ntɛ tɔŋgbɔpnɛ fɛ ntɛ pəntɔmar pacərɛ mɔ.
3Itɔ ɔsɔŋɛ ntɛ o ntɛ tɔ nəloku kubump, andene ti daŋ peŋ, kɔ ntɛ məŋmɛŋkəs fum dɛləŋəs dukulɔ mɔ, andedəŋk ti kəlɔ kəroŋ.»
4«Iclok'un ti, nəna anapa'em: Ta nənesɛ aŋɛ ŋandif dis gbəcərəm, kɔ tɛyɛfɛ dənda ta ŋantam tɔlɔm o tɔlɔm sɔ mɔ.
5Indementər'un nwɛ pəmar nənesɛ mɔ: Nənesɛ nwɛ endif pəkafəlɛ sɔ pətam kələm'əm Yahanama mɔ. Ɛy! Iclok'un, nkɔn pəmar nənesɛ!
6Bafɔ gbaŋa kəcamət y'ancaməs pəsam gbəleŋ mɛrəŋ? Awa! Iclok'un a Kanu kəfɔpəl ali ŋin yi dacɔ.
7Ali cəfon ca domp donu alɔm ci fəp. Ta nənesɛ, bawo pəlel ponu pencepər pa gbaŋa yɛlarəm!»
8«Iclok'un ti: Nwɛ o nwɛ owosɛ afum alarəm dacɔ a wəcɛpsɛ kem darəŋ ɔyɔnɛ, Wan ka Wərkun endesɔrəmnɛ-wosɛ nnɔ fɔr ya mɛlɛkɛ a Kanu kiriŋ, a wəkɔn fum wəkakɔ ɔyɔnɛ.
9Mba məna nwɛ məndekɔbupərɛ ti afum dacɔ mɔ, Wan ka Wərkun endekɔsɔrəmnɛ-ce məna wəkayi mɛlɛkɛ a Kanu fɔr kiriŋ.
10Nwɛ o nwɛ oloku pəlɛc pa Wan ka Wərkun, andekɔŋaŋnɛnɛ wəkayi, mba nwɛ o nwɛ ɔlɔməs Amera Ŋecempi ŋa Kanu, afɔdekɔŋaŋnɛnɛ kɔ.»
11«K'ande packekərɛ nu nde dəkətola Kanu da aSuyif, kɔ pəyɔnɛ fɛ ti nda aboc kiti, kɔ pəyɔnɛ fɛ ti abɛ-ɛ, ta nəcɛm-cɛmnɛ ntɛ nəŋkɔyacnɛ, kɔ tɔkɔ nəŋkɔloku mɔ,
12bawo Amera Ŋecempi ŋa Kanu ŋendekɔtəks'on gbəncana babɔkɔ tɔkɔ pəmar nəndekɔloku mɔ.»
13Kɔ fum wəlɔma oloku Yesu kənay kaŋkɔ disrɛ: «Wətəksɛ, məloku wɛnc'im a səyerɛnɛ kɛ kosu!»
14Kɔ Yesu oloku fum wəkakɔ: «Anɔ ɔ'cəmbər'im kəyɔnɛ ka wəboc kiti nu dacɔ, kɔ pəyɔnɛ fɛ ti, wəyer'un daka donu-ɛ?»
15Kɔ tɛyɛfɛ dənda, kɔ Yesu oloku ŋa: «Nəkɛmbərnɛ kəbɔtər ka kəyɔ daka dɛlarəm, bawo bafɔ daka dadɔkɔ dɔtɔmpər tecepərɛnɛ ta fum doru, ali wəkayi pəyɔ daka dɛlarəm.»
16Kɔ Yesu oloku ŋa capafɔ cəlɔma: «Fum wəka daka wəlɔma ɛnayɔ ntɔf nyɛ yenctesɛ yɔbɔf mɔ.
17Pəccɛm-cɛmnɛ, pəcyifnɛ: ‹Cəke cɔ indeyɔ-ɛ? Bawo iyɔ fɛ kəfo nkɛ iŋkɔloŋka yɛtɛl yem fəp mɔ.›
18Kɔ fum nwɛ olokunɛ, ‹Ntɛ tɔ indeyɔ: Kəwɔkəc kɔ iŋkɔ cɛlɛ cem, isɛl ncɛ cəmbɛk mɔ, iloŋka ci disrɛ malɔ kɔ ca yem yɔlɔma.
19Kɔ tɛyɛfɛ dənda-ɛ, ilokunɛ dɛbəkəc: «Iyɔ daka dɛlarəm dɛmɛŋkərnɛ meren mɛlarəm. Iŋesəm oŋ, idi, imun iwoləs.»›
20Mba kɔ Kanu kəloku kɔ: ‹Məna Wəbəc, Wətɔcərɛ tes! Pibi pa mɔkɔ yati pɔ andewer'əm kiyi kam doru. Tɔkɔ məlompəs mɔ, anɔ ɔ məndesakərɛ ti-ɛ?›»
21Kɔ Yesu ɔnɔcər: «Itɔ pəyi fum nwɛ endeloŋka daka dɔn, a ta Kanu kəŋnəŋk kəyɔ kɔn daka mɔ-ɛ.»
22Kɔ Yesu oloku acɛpsɛ ɔn darəŋ: «Itɔ ɔsɔŋɛ ntɛ ilok'un: Ta nəcɛm-cɛmnɛ teta doru donu—ake nəndedi-ɛ. Ta nəcɛm-cɛmnɛ sɔ teta dis donu—ake nəndebɛrnɛ-ɛ.
23Bawo kəyi doru kəncepər yeri, kɔ dis dencepər yamos.
24Nəkɔkcɛ bɛmp ya ser: Yɔfɔbɔf, yɔfɔtɛl, yɔfɔmɛŋkərnɛ, yɔyɔ fɛ cɛlɛ, mba Kanu kəŋsɔŋ yi yeri. Nəna nəncepər bɛmp yayɔkɔ pəbɔlɛ!
25Anɔ ɔ kəcɛm-cɛmnɛ kɔn kəntam kəbɛrɛnɛ kururu katin gboŋ kəwon kɔn doru-ɛ?
26Kɔ pəyɔnɛ a nəfɔtam ali tes tɛfɛt-ɛ, ake nəŋkɔcɛm-cɛmnɛnɛ tɔkɔ tɛncəmɛ mɔ?
27Nəgbətnɛ ntɛ yɛlɛŋk ya dalɛ yompoŋ mɔ: Yɔfɔbəc, yɔfɔdu yamos, mba iclok'un, ali wəbɛ Sulemani kɔ daka da debeki dɔn, ɛnayɔ fɛ yamos nyɛ yɛnatesɛ pəmɔ pɛlɛŋk papɔkɔ pin mɔ.
28Yika yeyi mɔkɔ dalɛ, alna pacləm yi dənɛnc, mba Kanu kəŋsɔŋɛ pəmar yi. Nəna, aŋɛ kəlaŋ konu kəmpicɛ mɔ, nəntam kəlaŋ tes tin: Pipicɛ oŋ cəke o cəke, itɔ Kanu kəndeyɔn'on!
29Kɔ nəna, ta nətɔrəsnɛ kəcɛm-cɛmnɛ teta yeri yɔkɔ nənde nəcdi mɔ, ta nəcɛm-cɛmnɛ teta yomunəs yɔkɔ nənde nəcmunəs mɔ.
30Bawo acuru a doru dandɛ ŋancɛm-cɛmnɛ teta ca yayɔkɔ. Kɔ nəna, Papa konu ɛncərɛ a nəfaŋ yi.
31Nətɛn kəbɛrɛ akip ŋa dɛbɛ da Kanu dəntɔf, nkɔn Kanu endesɔŋ nu yɛlpəs yɔkɔ.»
32«Ta mənesɛ, nəna acɛps'em darəŋ! Bawo pəmbɔt Papa konu kəsɔŋ nu dɛbɛ.
33Nəcaməs daka donu, nəpocɛ kəway kaŋkɔ atɔyɔ daka. Ntɛ tɔŋsɔŋɛ nəmɛŋkərnɛ daka da alna ndena Kanu mɔ. Daka da ndena Kanu dɔfɔlip! Dəndo wəke eyi fɛ nwɛ ɔŋlɔtərnɛ di mɔ. Ate ŋeyi fɛ nŋɛ ŋɔŋsɔm di mɔ.
34Bawo da daka donu deŋyi mɔ, difɔ abəkəc ŋonu ŋeŋyi.»
35«Nəgbəncnɛ səbɛlɛt dəfi, nəmot səlamp sonu, nəcəmɛ belbel!
36Nəyi pəmɔ abum aŋɛ ŋandekar wəbɛ kəŋan kəder kəyɛfɛ dəŋgbaŋnɛ mɔ, ntɛ tɔŋsɔŋɛ wəkakɔ ɔnckɔnader pəsut-sut kumba, ŋa ŋagbitɛ kɔ ki katəna mɔ.
37Pəbɔt acar akakɔ wəbɛ kəŋan, ɔnckɔnader pəbəp kɔ pəckar kəgbitɛ kɔ mɔ. Amina! Iclok'un ti: Endegbəncnɛ bɛlɛt, pədəs acar akakɔ dəmɛsa kəkɔdi yeri, nkɔn pəyerəs ŋa yi.
38Ali pəyɔnɛ fɔ cɛk-cɛk cɔ ender, kɔ pəyɔnɛ fɛ ti-ɛ dɔsɔka, mba k'ɛmbəp ŋa ta ŋandirɛ-ɛ, pəbɔt ŋa!»
39«Nəcərɛ belbel a kɔ wəbɛ wəka kəlɔ ɛncərɛ tɛm ntɛ wəke ender mɔ-ɛ, ɔfɔsak kɔ pəwɔkəc kəlɔ kɔn.
40Nəna sɔ, nəcəmɛ belbel! Bawo Wan ka Wərkun endeder tɛm ntɛ nəntɔyɔ kɔ amera mɔ.»
41Kɔ Piyɛr eyif Yesu: «Wəbɛ, səna gbəcərəm ŋɔ məŋloku capafɔ cancɛ, ka fəp fɔ məŋloku ti ba?»
42Kɔ Wəbɛ oloku: «Wəcəmbər-cəmbər daka wəre olomp, pəsɔk domp-ɛ? Nkɔn ɔyɔnɛ nwɛ wəbɛ oŋloku: ‹Isɔŋ'əm yɛbəc nyɛ: Məcsɔŋ yeri afum aŋɛ ŋayi kəbəc'em mɔ, tɛm ntɛ pəmar mɔ.›
43Pəbɔt wəcar wəkakɔ wəbɛ kɔn oŋlukus pəbəpɛ kɔ yɛbəc yayɔkɔ mɔ!
44Ilok'un ti, kance kɔ: Nkɔn ɔ wəbɛ kɔn ɔŋsɔŋ yɛbəc ya kəcəmbər-cəmbər ka daka dɔn fəp!
45Mba kɔ wəcar olokunɛ dɛbəkəc: ‹Wəbɛ kem ɛntayɛfɛ fɛ kəder,› pəyɛfɛ kəsut ka amarəs arkun kɔ aran-ɛ, pəcdi, pəcmun haŋ pəcis-ɛ,
46wəbɛ ka wəcar kakɔ endeder dɔsɔk ndɛ ɔntɔyɔ kɔ amera mɔ, dec ndɛ ɔntɔcərɛ mɔ, tɛm tatɔkɔ ɛmbɛləs wəcar wəkakɔ, pəsɔŋ kɔ kəway nkɛ pəmar pasɔŋ acar atɔnenɛ wəbɛ kəŋan mɔ.
47Wəcar nwɛ ɛncərɛ tɛfaŋ ta wəbɛ kɔn mɔ, ta olompəsnɛnɛ kɔ mɔ, ta ɔŋyɔ tɔkɔ wəbɛ kɔn ɛfaŋ mɔ, aŋsut wəcar wəkakɔ kəsut kəpɔŋ.
48Mba wəcar nwɛ ɔntɔcərɛ tɛfaŋ ta wəbɛ kɔn mɔ, pəciya-ciya kəlompəs mɔ, wəcar wəkakɔ pəpic pɔ aŋsut kɔ. K'anasɔŋ fum pəlarəm-ɛ, pəlarəm pɔ aŋwer kɔ. K'anasɔŋ kɔ kəmɛŋk pəlarəm-ɛ, aŋnaŋkanɛ kəwer kɔ pəlarəm.»
49«Nɛnc d'inder kəbɛr doru, k'ifaŋɛ di kəmar!
50Pəmar isɔtɔ kəgbət dəromun teta Kanu, kɔ kəŋwon'im kəyi.
51Nəncɛm-cɛmnɛ a pəforu pɔ iŋkɛrɛ kəsɔŋ doru ba? Ala de, mba kəgbɛy k'iŋkɛrɛ.
52Kəyɛfɛ oŋ tantɛ aŋɛ o aŋɛ ŋayi kəcamət kəlɔ disrɛ, ŋandegbɛyɛnɛ akɔ ŋayi maas akɔ ŋayi mɛrəŋ.
53Kas kəgbɛy wan wərkun, wan wərkun pəgbɛy kas, kɛrɛ kəgbɛy wan wəran, wan wəran pəgbɛy kɛrɛ, kɔncəra kəgbɛy wəran ka wan kɔn, wansɔ pəgbɛy kɔncəra.»
54Kɔ Yesu oloku sɔ kənay: «Kɔ nənəŋk kəp kəgbəpərnɛ ntende dec dɛŋkalɛ mɔ, nəŋkulɛ katina: ‹Kəder kɔ wəcafən endeder!› Pəfɔ-won wəcafən pəder.
55Mba kɔ nənəŋk afef ŋa kəca kətɔt ŋocwur-ɛ, nəloku: ‹Kəwonɛ kɔ pənder,› tɔkɔ nəŋloku ti mɔ, itɔ teŋyi.
56Nəna Abaŋɛnɛ dofum! Nəntam kəcərɛ mɛgbɛkərɛ ma tɔkɔ antɔf kɔ kɔm yeŋyi mɔ. Ta ake tɔ nəntɔtam kəcərɛnɛ tɛgbɛkərɛ ta tɛm tantɛ, ntɛ tɛyɛfɛ ndena Kanu mɔ-ɛ?»
57«Ta ake tɔ nəntɔcərɛnɛ nənasərka tɔkɔ pəmar nəyɔ mɔ-ɛ?
58Kɔ məndekɔ kɔ wəyɛfərɛnɛ kam dəŋkiti-ɛ, məwosɛ nətəŋnɛ dɔpɔ kərɛsna. Kɔ pəyɔnɛ fɛ ti-ɛ, eŋkekər'am dabɛ. Wəboc kiti pəsɔŋ'əm wəsɔdar, wəsɔdar ɛbɛr'əm dəbili.
59Iclok'əm məfɔwur dəbili kɔ məntɔlip kəsɔŋ pəsam pɔkɔ məntɔmpərɛ wəkekərɛ kam dəbili mɔ.