Exodus 29

¹וזה הדבר אשר תעשה להם לקדש אתם לכהן לי לקח פר אחד בן בקר ואילים שנים תמימם

²ולחם מצות וחלות מצות בללות בשמן ורקיקי מצות . . סלת חטים תעשה אתם

³ונתתה אתם על סל אחד והקרבת אתם בסל ואת הפר ואת שני האילים

⁴ואת אהרן ואת בניו תקריב אל פתח אהל מועד ורחצת אתם במים

⁵ולקחת את הבגדים והלבשת את אהרן את הכיתנת וחגרת אתו אבניט והלבשת אתו את המעיל ונתתה עליו את האפוד . . ואת החשן ואפדת לו בחשב האפוד

⁶ושמת המצנפת על ראשו ונתתה את נזר הקדש על המצנפת

⁷ולקחת את שמן המשחה ויצקת על ראשו ומשחת אתו

⁸ואת בניו תקריב והלבשתם כיתנת

⁹וחגרת אתם אבנטים אהרן ובניו וחבשת להם מגבעות והיתה להם כהנה לחקת עולם ומלאת יד אהרן ויד בניו

¹⁰והקרבת את הפר לפני יהוה פתח אהל מועד וסמך אהרן ובניו את ידיהם על ראש הפר

¹¹ושחטת את הפר לפני יהוה פתח אהל מועד

¹²ולקחת מדם הפר ונתתה על קרנות המזבח באצבעך ואת כל הדם תשפך אל יסוד המזבח

¹³ולקחת את כל החלב המכסה את הקרב ואת יותרת . הכבד ואת שתי הכליות ואת החלב אשר עליהן והקטרת המזבחה

¹⁴ואת בשר הפר ואת עורו ואת פרשו תשרף באש מחוץ למחנה חטאת היא

¹⁵ואת האיל האחד תקח וסמך אהרן ובניו את ידיהם על ראש האיל

¹⁶ושחטת את האיל ולקחת את דמו וזרקת על המזבח סביב

¹⁷ואת האיל תנתח לנתחיו ורחצת קרבו וכרעיו ונתתה על נתחיו ועל ראשו

¹⁸והקטרת את כל האיל המזבחה עלה הוא ליהוה ריח ניחח אשה הוא ליהוה

¹⁹ולקחת את האיל השני וסמך אהרן ובניו את ידיהם על ראש האיל

²⁰ושחטת את האיל ולקחת מדמו ונתתה על תנך אזן אהרן ועל תנך אזן בניו הימנית ועל בהון ידם הימנית ועל בהון רגלם הימנית וזרקת את הדם על המזבח סביב

²¹. . . . . . . . . . . . . . . . . . . . . . . . . .

²²ולקחת מן האיל החלב את האליה ואת החלב המכסה את הקרב ואת יותרת הכבד ואת שתי הכליות ואת החלב אשר עליהן ואת שוק הימין כי איל מלאים הוא

²³וככר לחם אחת וחלת לחם שמן אחת ורקיק אחד מסל המצות אשר לפני יהוה

²⁴ושמת הכל על כפי אהרן ועל כפי בניו והנפת אתם תנופה לפני יהוה

²⁵ולקחת אתם מידם והקטרת אתם המזבחה על העלה לריח ניחח . . אשה הוא ליהוה

²⁶ולקחת את החזה מאיל המלאים מאשר לאהרן והנפת אתו תנופה לפני יהוה והיה לך למנה

²⁷וקדשת את חזה התנופה ואת שוק התרומה אשר הונף ואשר הורם מאיל המלאים מאשר לאהרן ומאשר לבניו

²⁸והיה לאהרן ולבניו לחק עולם מאת בני ישראל כי תרומה הוא ותרומה יהיה מאת בני ישראל מזבחי שלמיהם תרומתם ליהוה ולקחת משמן המשחה ומן הדם אשר על המזבח והזית על אהרן ועל בגדיו ועל בניו ועל בגדי בניו אתו וקדשתו ואת בגדיו ואת בניו ואת בגדי בניו אתו

²⁹ובגדי הקדש אשר לאהרן יהיו לבניו אחריו למשחה בם ולמלא בם את ידם

³⁰שבעת ימים ילבשם הכהן תחתיו מבניו אשר יבוא אל אהל מועד לשרת בקדש

³¹ואת איל המלאים תקח ובשלת את בשרו במקום קדוש

³²ואכל אהרן ובניו את בשר האיל ואת הלחם אשר בסל פתח אהל מועד

³³יאכלו אתם אשר כפר בם למלא בם את ידם לקדש אתם וזר לא יאכל כי קדש הם

³⁴ואם יותר מבשר המלאים ומן הלחם עד הבקר ושרפת את הנותר באש לא יאכל כי קדש הוא

³⁵ועשית לאהרן ולבניו ככה ככל אשר צויתי אתך שבעת ימים תמלא את ידם

³⁶ופר חטאת תעשה ליום על הכפרים וחטאת על המזבח בכפרך עליו ומשחת אתו לקדשו

³⁷שבעת ימים תכפר על המזבח וקדשת אתו והיה המזבח קדש קדשים כל הנגע במזבח יקדש

³⁸וזה אשר תעשה על המזבח כבשים בני שנה שנים ליום תמיד עלת תמיד

³⁹את הכבש האחד תעשה בבקר ואת הכבש השני תעשה בין הערבים

⁴⁰ועשרון סלת בלול בשמן כתית רבעית ההין ונסך רבעית ההין יין לכבש האחד

⁴¹ואת הכבש השני תעשה בין הערבים כמנחת הבקר וכנסכו תעשה לו ריח ניחח אשה ליהוה

⁴²עלת תמיד לדרתיכם פתח אהל מועד לפני יהוה אשר אועד לך שמה לדבר אליך שם

⁴³ונדרשתי שם לבני ישראל ונקדש בכבודי

⁴⁴וקדשתי את אהל מועד ואת המזבח ואת אהרן ואת בניו אקדש לכהן לי

⁴⁵ושכנתי בתוך בני ישראל והייתי להם לאלהים

⁴⁶וידעו כי אני יהוה אלהיהם אשר הוצאתי אתם מארץ מצרים לשכני בתוכם אני יהוה אלהיהם