We Believe JesusFé, Esperança e Nova Vida

Exodus 23

Samaritan Pentateuch · hebraico

← Exodus 22 Exodus Exodus 24 →

1לא תשא שמע שוא אל תשית ידך עם רשע להיות עד חמס

2לא תהיה אחרי רבים לרעות ולא תענה על ריב לנטות אחרי רבים להטות

3ודל לא תהדר בריבו

4כי תפגע שור איבך או חמרו או כל בהמתו תעה השב תשיבנו לו

5כי תראה חמור שנאך רבץ תחת משאו וחדלת מעזב לו עזב תעזב עמו

6לא תטה משפט אביונך בריבו

7מדבר שקר תרחק ונקיא וצדיק אל תהרג כי לא הצדיק רשע

8ושחד אל תקח כי השחד יעור עיני פקחים ויסלף דברי צדקים

9וגר לא תלחצו ואתם ידעתם את נפש הגר כי גרים הייתם בארץ מצרים

10ושש שנים תזרע את ארצך ואספת את תבואתה

11והשבעית תשמטנה ונטשתה ואכלו אביוני עמך ויתרם תאכל חית השדה כן תעשה לכרמך ולזיתך

12ששת ימים תעשה מעשיך וביום השביעי תשבת למען ינוח עבדך ואמתך כמוך וכל בהמתך והגר

13וכל אשר אמרתי אליכם תשמרו ושם אלהים אחרים לא תזכר ולא ישמעו על פיך

14שלש רגלים תחג לי בשנה

15את חג המצות תשמר שבעת ימים תאכל מצות כאשר צויתיך למועד חדש האביב כי בו יצאת ממצרים ולא יראו פני ריקם

16וחג הקציר בכורי מעשיך אשר תזרע בשדה וחג האסף בצאת השנה באספך את מעשיך מן השדה

17שלש פעמים בשנה יראה כל זכורך את פני ארון יהוה

18לא תזבח על חמץ דם זבחי ולא ילין חלב חגי עד בקר

19ראשית בכורי אדמתך תביא ביתה יהוה אלהיך לא תבשל גדי בחלב אמו כי עשה זאת כזבח שכח ועברה היא לאלהי יעקב

20הנה אנכי שלח מלאכי לפניך לשמרך בדרך ולהביאך אל המקום אשר הכנתי

21השמר מפניו ושמע בקולו אל תמרי בו כי לא ישא לפשעכם כי שמי בקרבו

22כי אם שמע תשמעו בקולי ועשיתם את כל אשר אדבר ואיבתי את איביך וצרתי את צרריך

23כי ילך מלאכי לפניך והביאך אל הכנעני והאמרי והחתי והגרגשי והפרזי והחוי והיבוסי והכחדתיו

24לא תשתחוה לאלהיהם ולא תעבדם ולא תעשה כמעשיהם כי הרס תהרסם ושבר תשבר מצבתם

25ועבדתם את יהוה אלהיכם וברך את לחמך ואת מימיך והסרתי מחלה מקרבך

26ולא תהיה משכלה ועקרה בארצך את מספר ימיך אמלא

27את אימתי אשלח לפניך והמתי את כל העם אשר תבוא בהן ונתתי את כל איביך אליך ערף

28ושלחתי את הצרעה לפניך וגרשה את הכנעני ואת האמרי ואת החתי ואת הגרגשי ואת הפרזי ואת החוי ואת היבוסי מלפניך

29לא אגרשנו מפניך בשנה אחת פן תהיה הארץ שממה ורבה עליך חית השדה

30מעט מעט אגרשנו מפניך עד אשר תפרה ונחלת את הארץ

31ושתי את גבולך מים סוף ועד ים פלשתים וממדבר עד הנהר כי אתן בידכם את ישבי הארץ וגרשתם מפניך

32לא תכרת להם ולאלהיהם ברית

33לא ישבו בארצך פן יחטיאו אתך לי כי תעבד את אלהיהם כי יהיו לך למוקש

← Exodus 22 Exodus Exodus 24 →

Exodus 23 — hebraico:

Jewish Publication Society Old TestamentHebModern: Modern Hebrew BibleMapM: מקרא על פי המסורה (Miqra `al pi ha-Mesorah)Westminster Leningrad Codex