1ⲡⲉⲯⲁⲗⲙⲟⲥ ⲛⲧⲙⲛⲧⲣⲙⲛϩⲏⲧ ⲛⲁⲥⲁⲫ ϯϩⲧⲏⲧⲛ ⲡⲁⲗⲁⲟⲥ ⲉⲡⲁⲛⲟⲙⲟⲥ ⲣⲉⲕⲧⲡⲉⲧⲛⲙⲁⲁϫⲉ ⲉⲛϣⲁϫⲉ ⲛⲧⲁⲧⲁⲡⲣⲟ</ab>
2ϯⲛⲁⲟⲩⲱⲛ ⲛⲣⲱⲓ ϩⲛ ϩⲉⲛⲡⲁⲣⲁⲃⲟⲗⲏ ϯⲛⲁϫⲱ ⲛϩⲉⲛⲡⲣⲟⲃⲗⲏⲙⲁ ϫⲓⲛ ⲛϣⲟⲣⲡ</ab>
3ⲛⲉⲛⲧⲁⲛⲥⲟⲧⲙⲟⲩ ⲁⲩⲱ ⲁⲛⲉⲓⲙⲉ ⲉⲣⲟⲟⲩ ⲛⲉⲛⲧⲁⲛⲉⲛⲉⲓⲟⲧⲉ ϫⲟⲟⲩ ⲉⲣⲟⲛ</ab>
4ⲙⲡⲟⲩϩⲱⲡ ⲉⲛⲉⲩϣⲏⲣⲉ ⲉⲕⲉϫⲱⲙ ⲉⲩϫⲱ ⲛⲛⲉⲥⲙⲟⲩ ⲙⲡϫⲟⲉⲓⲥ ⲁⲩⲱ ⲛⲉϥϭⲟⲙ ⲙⲛ ⲛⲉϣⲡⲏⲣⲉ ⲛⲧⲁϥⲁⲁⲩ</ab>
5ⲁⲩⲧⲁϩⲟ ⲉⲣⲁⲧϥ ⲛⲟⲩⲙⲛⲧⲣⲉ ϩⲛ ⲓⲁⲕⲱⲃ ⲁϥⲕⲱ ⲛⲟⲩⲛⲟⲙⲟⲥ ϩⲙ ⲡⲓ︤ⲏ︦ⲗ︥ ⲡⲉⲛⲧⲁϥϩⲱⲛ ⲙⲙⲟϥ ⲉⲧⲟⲟⲧⲟⲩ ⲛⲛⲉⲛⲉⲓⲟⲧⲉ ⲉⲟⲩⲟⲛϩϥ ⲉⲃⲟⲗ ⲛⲛⲉⲩϣⲏⲣⲉ</ab>
6ϫⲉⲕⲁⲥ ⲉⲣⲉⲕⲉⲅⲉⲛⲉⲁ ⲉⲓⲙⲉ ⲛϣⲏⲣⲉ ⲉⲧⲟⲩⲛⲁϫⲡⲟⲟⲩ ⲛⲥⲉⲧⲱⲟⲩⲛ ⲛⲥⲉϫⲟⲟⲩ ⲉⲛⲉⲩϣⲏⲣⲉ</ab>
7ϫⲉⲕⲁⲥ ⲉⲩⲉⲕⲁⲧⲉⲩϩⲉⲗⲡⲓⲥ ϩⲓ ⲡⲛⲟⲩⲧⲉ ⲛⲥⲉⲧⲙⲣⲡⲱⲃϣ ⲛⲛⲉϩⲃⲏⲩⲉ ⲙⲡⲛⲟⲩⲧⲉ ⲛⲥⲉϣⲓⲛⲉ ⲛⲥⲁ ⲛⲉϥⲉⲛⲧⲟⲗⲏ</ab>
8ϫⲉⲕⲁⲥ ⲉⲛⲛⲉⲩϣⲱⲡⲉ ⲛⲑⲉ ⲛⲛⲉⲩⲉⲓⲟⲧⲉ ⲟⲩⲅⲉⲛⲉⲁ ⲉⲥϭⲟⲟⲙⲉ ⲉⲥϯⲛⲟⲩϭⲥ ⲟⲩⲅⲉⲛⲉⲁ ⲉⲙⲡⲥⲥⲟⲩⲧⲛ ⲡⲉⲥϩⲏⲧ ⲉⲙⲡⲉ ⲡⲉⲥⲡ︤ⲛ︦ⲁ︥ ⲧⲁⲛϩⲟⲩⲧϥ ⲙⲛ ⲡⲛⲟⲩⲧⲉ</ab>
9ⲛϣⲏⲣⲉ ⲛⲉⲫⲣⲁⲓⲙ ⲉⲩⲥⲱⲙⲛⲧ ⲉⲩⲛⲉϫⲥⲟⲧⲉ ⲁⲩⲕⲟⲧⲟⲩ ϩⲙ ⲡⲉϩⲟⲟⲩ ⲙⲡⲡⲟⲗⲉⲙⲟⲥ</ab>
10ⲙⲡⲟⲩϩⲁⲣⲉϩ ⲉⲧⲇⲓⲁⲑⲏⲕⲏ ⲙⲡⲛⲟⲩⲧⲉ ⲁⲩⲱ ⲙⲡⲟⲩⲟⲩⲱϣ ⲉⲙⲟⲟϣⲉ ϩⲙ ⲡⲉϥⲛⲟⲙⲟⲥ</ab>
11ⲁⲩⲣⲡⲱⲃϣ ⲛⲛⲉϥⲡⲉⲧⲛⲁⲛⲟⲩϥ ⲛⲧⲁϥⲧⲥⲁⲃⲉⲛⲉⲩⲉⲓⲟⲧⲉ ⲉⲣⲟⲟⲩ ⲙⲡⲉⲩⲙⲧⲟ ⲉⲃⲟⲗ</ab>
12ⲛⲉϣⲡⲏⲣⲉ ⲛⲧⲁϥⲁⲁⲩ ϩⲙ ⲡⲕⲁϩ ⲛⲕⲏⲙⲉ ϩⲛ ⲧⲥⲱϣⲉ ⲛⲧϫⲁⲁⲛⲉ</ab>
13ⲁϥⲡⲉϩⲑⲁⲗⲁⲥⲥⲁ ⲁϥⲛⲧⲟⲩ ⲉⲃⲟⲗ ⲁϥⲧⲁϩⲉ ⲙⲙⲟⲟⲩ ⲉⲣⲁⲧⲟⲩ ⲛⲑⲉ ⲛⲟⲩⲁⲥⲕⲟⲥ</ab>
14ⲁϥϫⲓⲙⲟⲉⲓⲧ ϩⲏⲧⲟⲩ ϩⲛ ⲟⲩⲕⲗⲟⲟⲗⲉ ⲙⲡⲉϩⲟⲟⲩ ⲁⲩⲱ ϩⲙ ⲡⲟⲩⲟⲉⲓⲛ ⲙⲡⲕⲱϩⲧ ⲛⲧⲉⲩϣⲏ ⲧⲏⲣⲥ</ab>
15ⲁϥⲡⲱϩ ⲛⲟⲩⲡⲉⲧⲣⲁ ϩⲓ ⲡϫⲁⲓⲉ ⲁϥⲧⲥⲟⲟⲩ ⲛⲑⲉ ⲙⲡⲛⲟⲩⲛ ⲉⲧⲛⲁϣⲱϥ</ab>
16ⲁϥⲛⲙⲙⲟⲟⲩ ⲉⲃⲟⲗ ϩⲛ ⲟⲩⲡⲉⲧⲣⲁ ⲁⲩⲱ ⲁϥⲛⲙⲙⲟⲩⲉⲓⲛ ⲉⲡⲉⲥⲏⲧ ⲛⲑⲉ ⲛϩⲉⲛⲉⲓⲉⲣⲱⲟⲩ</ab>
17ⲁⲩⲟⲩⲱϩ ⲉⲧⲟⲟⲧⲟⲩ ⲉⲣⲛⲟⲃⲉ ⲉⲣⲟϥ ⲁⲩϯⲛⲟⲩϭⲥ ⲙⲡⲉⲧϫⲟⲥⲉ ϩⲛ ⲟⲩⲙⲁ ⲉⲙⲛⲙⲟⲟⲩ ⲛϩⲏⲧϥ</ab>
18ⲁⲩⲡⲉⲓⲣⲁⲍⲉ ⲙⲡⲛⲟⲩⲧⲉ ϩⲛ ⲛⲉⲩϩⲏⲧ ⲉⲧⲣⲉⲩⲁⲓⲧⲉⲓ ⲛϩⲉⲛϭⲓⲛⲟⲩⲟⲟⲙ ⲛⲛⲉⲩⲯⲩⲭⲏ</ab>
19ⲁⲩⲕⲁⲧⲁⲗⲁⲗⲉⲓ ⲙⲡⲛⲟⲩⲧⲉ ⲉⲩϫⲱ ⲙⲙⲟⲥ ϫⲉ ⲙⲏ ⲟⲩⲛϭⲟⲙ ⲙⲡⲛⲟⲩⲧⲉ ⲉⲥⲃⲧⲉⲟⲩⲧⲣⲁⲡⲉⲍⲁ ϩⲓ ⲡϫⲁⲓⲉ</ab>
20ⲉⲃⲟⲗ ϫⲉ ⲁϥⲡⲁⲧⲁⲥⲥⲉ ⲛⲟⲩⲡⲉⲧⲣⲁ ⲁⲩϣⲟⲩⲟ ⲛϭⲓ ϩⲉⲛⲙⲟⲟⲩ ⲁⲩⲱ ⲁⲩⲥⲱⲕ ⲛϭⲓ ϩⲉⲛⲙⲟⲩ ⲛⲥⲱⲣⲙ ⲙⲏ ⲟⲩⲛϣϭⲟⲙ ⲙⲙⲟϥ ⲟⲛ ⲉϯⲟⲉⲓⲕ ⲛⲁⲛ ⲏ ⲉⲥⲃⲧⲉⲟⲩⲧⲣⲁⲡⲉⲍⲁ ⲙⲡⲉϥⲗⲁⲟⲥ</ab>
21ⲉⲧⲃⲉ ⲡⲁⲓ ⲁⲡϫⲟⲉⲓⲥ ⲥⲱⲧⲙ ⲁϥⲛⲟⲩϭⲥ ⲁⲩⲕⲱϩⲧⲙⲟⲩϩ ϩⲛ ⲓⲁⲕⲱⲃ ⲁⲩⲟⲣⲅⲏ ⲉⲓ ⲉϩⲣⲁⲓ ⲉϫⲙ ⲡⲓ︤ⲏ︦ⲗ︥</ab>
22ϫⲉ ⲙⲡⲟⲩⲡⲓⲥⲧⲉⲩⲉ ⲉⲡⲛⲟⲩⲧⲉ ⲟⲩⲇⲉ ⲙⲡⲟⲩϩⲉⲗⲡⲓⲍⲉ ⲉⲡⲉϥⲟⲩϫⲁⲓ</ab>
23ⲁⲩϩⲱⲛ ⲉⲧⲟⲟⲧⲟⲩ ⲛⲛⲉⲕⲗⲟⲟⲗⲉ ⲉⲧⲛⲧⲡⲉ ⲙⲙⲟⲟⲩ ⲁⲩⲱ ⲁϥⲟⲩⲱⲛ ⲛⲛⲣⲟ ⲛⲧⲡⲉ</ab>
24ⲁϥϩⲱⲟⲩ ⲛⲁⲩ ⲙⲡⲙⲁⲛⲛⲁ ⲉⲟⲩⲟⲙϥ ⲁϥϯ ⲛⲁⲩ ⲙⲡⲟⲉⲓⲕ ⲛⲧⲡⲉ</ab>
25ⲡⲟⲉⲓⲕ ⲛⲛⲁⲅⲅⲉⲗⲟⲥ ⲁⲡⲣⲱⲙⲉ ⲟⲩⲟⲙϥ ⲁϥϫⲟⲟⲩ ⲛⲟⲩϩⲣⲉ ⲛⲁⲩ ⲉⲩⲥⲉⲓ</ab>
26ⲁϥⲧⲟⲩⲛⲉⲥⲟⲩ ⲧⲟⲩⲣⲏⲥ ⲉⲃⲟⲗ ϩⲛ ⲧⲡⲉ ⲁϥⲉⲓⲛⲉ ⲛⲟⲩⲉⲙⲛⲧ ϩⲛ ⲧⲉϥϭⲟⲙ</ab>
27ⲁϥϩⲱⲟⲩ ⲉϫⲱⲟⲩ ⲛϩⲉⲛⲥⲁⲣⲝ ⲛⲑⲉ ⲙⲡϣⲟⲉⲓϣ ⲁⲩⲱ ϩⲉⲛϩⲁⲗⲁⲧⲉ ⲉⲩϩⲏⲗ ⲛⲑⲉ ⲙⲡϣⲱ ⲛⲑⲁⲗⲁⲥⲥⲁ</ab>
28ⲁⲩϩⲉ ⲉⲧⲙⲏⲧⲉ ⲛⲧⲉⲩⲡⲁⲣⲉⲙⲃⲟⲗⲏ ⲁⲩⲱ ⲡⲕⲱⲧⲉ ⲙⲡⲉⲩⲙⲁ ⲛϣⲱⲡⲉ</ab>
29ⲁⲩⲟⲩⲱⲙ ⲁⲩⲥⲉⲓ ⲉⲙⲁⲧⲉ ⲁϥⲉⲓⲛⲉ ⲛⲁⲩ ⲙⲡⲉⲧⲟⲩⲟⲩⲁϣϥ</ab>
30ⲙⲡⲟⲩⲣϭⲣⲱϩ ϩⲛ ⲧⲉⲩⲉⲡⲓⲑⲩⲙⲓⲁ ⲉⲧⲓ ⲉⲣⲉⲧⲉϩⲣⲉ ϩⲛ ⲣⲱⲟⲩ</ab>
31ⲁⲧⲟⲣⲅⲏ ⲙⲡⲛⲟⲩⲧⲉ ⲉⲓ ⲉϩⲣⲁⲓ ⲉϫⲱⲟⲩ ⲁϥⲙⲟⲩⲟⲩⲧ ⲙⲡⲉⲩϩⲟⲩⲟ ⲁϥⲧⲁⲩⲟ ⲉϩⲣⲁⲓ ⲛⲛⲥⲱⲧⲡ ⲙⲡⲓ︤ⲏ︦ⲗ︥</ab>
32ϩⲛ ⲛⲁⲓ ⲧⲏⲣⲟⲩ ⲁⲩⲣⲛⲟⲃⲉ ⲟⲛ ⲙⲡⲟⲩⲡⲓⲥⲧⲉⲩⲉ ϩⲛ ⲛⲉϥϣⲡⲏⲣⲉ</ab>
33ⲁⲛⲉⲩϩⲟⲟⲩ ⲱϫⲛ ϩⲙ ⲡⲡⲉⲧϣⲟⲩⲉⲓⲧ ⲁⲩⲱ ⲛⲉⲩⲣⲟⲙⲡⲉ ϩⲛ ⲟⲩϭⲉⲡⲏ</ab>
34ⲛⲧⲉⲣⲉϥⲙⲟⲩⲟⲩⲧ ⲛϩⲏⲧⲟⲩ ⲛⲧⲁⲩϣⲓⲛⲉ ⲛⲥⲱϥ ⲁⲩⲕⲧⲟⲟⲩ ⲁⲩϣⲟⲣⲡⲟⲩ ⲉⲡⲛⲟⲩⲧⲉ</ab>
35ⲁⲩⲣⲡⲙⲉⲉⲩⲉ ϫⲉ ⲡⲛⲟⲩⲧⲉ ⲡⲉ ⲡⲉⲩⲃⲟⲏⲑⲟⲥ ⲁⲩⲱ ⲡⲛⲟⲩⲧⲉ ⲉⲧϫⲟⲥⲉ ⲡⲉ ⲡⲉⲩⲣⲉϥⲥⲱⲧⲉ</ab>
36ⲁⲩⲙⲉⲣⲓⲧϥ ϩⲛ ⲧⲉⲩⲧⲁⲡⲣⲟ ⲁⲩϫⲓϭⲟⲗ ⲉⲣⲟϥ ϩⲙ ⲡⲉⲩⲗⲁⲥ</ab>
37ⲡⲉⲩϩⲏⲧ ⲇⲉ ⲛⲉϥⲥⲟⲩⲧⲱⲛ ⲁⲛ ⲛⲙⲙⲁϥ ⲟⲩⲇⲉ ⲙⲡⲟⲩⲧⲁⲛϩⲟⲩⲧϥ ϩⲛ ⲧⲉϥⲇⲓⲁⲑⲏⲕⲏ</ab>
38ⲛⲧⲟϥ ⲇⲉ ⲟⲩϣⲁⲛϩⲧⲏϥ ⲡⲉ ⲁⲩⲱ ϥⲛⲁⲕⲱ ⲉⲃⲟⲗ ⲛⲛⲉⲩⲛⲟⲃⲉ ⲛϥⲧⲙⲧⲁⲕⲟⲟⲩ ϥⲛⲁⲧⲁϣⲉⲕⲧⲟ ⲉⲃⲟⲗ ⲙⲡⲉϥϭⲱⲛⲧ ⲛϥⲛⲁϫⲉⲣⲟ ⲁⲛ ⲛⲧⲉϥⲟⲣⲅⲏ ⲧⲏⲣⲥ</ab>
39ⲁϥⲣⲡⲙⲉⲉⲩⲉ ϫⲉ ϩⲉⲛⲥⲁⲣⲝ ⲛⲉ ⲟⲩⲡ︤ⲛ︦ⲁ︥ ⲉϣⲁϥⲃⲱⲕ ⲡⲉ ⲉⲙⲉϥⲕⲟⲧϥ</ab>
40ϩⲁϩ ⲛⲥⲟⲡ ⲁⲩϯϭⲱⲛⲧ ⲛⲁϥ ϩⲓ ⲡϫⲁⲓⲉ ⲁⲩϯⲛⲟⲩϭⲥ ⲛⲁϥ ϩⲛ ⲟⲩⲙⲁ ⲉⲙⲛⲙⲟⲟⲩ ⲛϩⲏⲧϥ</ab>
41ⲁⲩⲕⲧⲟⲟⲩ ⲟⲛ ⲁⲩⲡⲉⲓⲣⲁⲍⲉ ⲙⲡⲛⲟⲩⲧⲉ ⲁⲩϯⲛⲟⲩϭⲥ ⲙⲡⲡⲉⲧⲟⲩⲁⲁⲃ ⲙⲡⲓ︤ⲏ︦ⲗ︥</ab>
42ⲙⲡⲟⲩⲣⲡⲙⲉⲉⲩⲉ ⲛⲧⲉϥϭⲓϫ ⲙⲡⲉϩⲟⲟⲩ ⲉⲛⲧⲁϥⲥⲟⲧⲟⲩ ⲉⲃⲟⲗ ϩⲛ ⲧϭⲓϫ ⲛⲛⲉⲧⲑⲗⲓⲃⲉ ⲙⲙⲟⲟⲩ</ab>
43ⲛⲑⲉ ⲛⲧⲁϥ ⲕⲁ ⲛⲉϥⲙⲁⲉⲓⲛ ϩⲛ ⲕⲏⲙⲉ ⲛⲉϥϣⲡⲏⲣⲉ ϩⲛ ⲧⲥⲱϣⲉ ⲛⲧϫⲁⲁⲛⲉ</ab>
44ⲁϥⲕⲧⲟ ⲛⲛⲉⲩⲉⲓⲉⲣⲱⲟⲩ ⲉϩⲉⲛⲥⲛⲟϥ ⲁⲩⲱ ⲛⲉⲩⲙⲟⲩ ⲛⲃⲉⲉⲃⲉ ϫⲉ ⲛⲛⲉⲩⲥⲱ</ab>
45ⲁϥϫⲟⲟⲩ ⲉϫⲱⲟⲩ ⲙⲡⲁϥⲛⲟⲩϩⲟⲣ ⲁϥⲟⲩⲟⲙⲟⲩ ⲁⲩⲱ ⲡⲉⲕⲣⲟⲩⲣ ⲁϥⲧⲁⲕⲟⲟⲩ</ab>
46ⲁϥϯ ⲙⲡⲉⲩⲕⲁⲣⲡⲟⲥ ⲙⲡⲕⲟⲟⲙϥ ⲁⲩⲱ ⲛⲉⲩϩⲓⲥⲉ ⲙⲡⲉϣϫⲉ</ab>
47ⲁϥⲙⲟⲩⲟⲩⲧ ⲛⲛⲉⲩⲃⲱ ⲛⲉⲗⲟⲟⲗⲉ ϩⲙ ⲡⲁⲗ ⲙⲡⲉ ⲁⲩⲱ ⲛⲉⲩⲛⲟⲩϩⲉ ϩⲙ ⲡϫⲁϥ</ab>
48ⲁϥϯ ⲛⲛⲉⲩⲧⲃⲛⲟⲟⲩⲉ ⲙⲡⲁⲗ ⲙⲡⲉ ⲁⲩⲱ ⲡⲉⲧϣⲟⲟⲡ ⲛⲁⲩ ⲙⲡⲕⲱϩⲧ</ab>
49ⲁϥϫⲟⲟⲩ ⲉϩⲣⲁⲓ ⲉϫⲱⲟⲩ ⲛⲧⲟⲣⲅⲏ ⲙⲡⲉϥϭⲱⲛⲧ ⲟⲩϭⲱⲛⲧ ⲙⲛ ⲟⲩⲟⲣⲅⲏ ⲙⲛ ⲟⲩⲑⲗⲓⲯⲓⲥ ⲟⲩⲧⲁⲩⲟ ϩⲓⲧⲛ ⲛⲁⲅⲅⲉⲗⲟⲥ ⲙⲡⲟⲛⲏⲣⲟⲥ</ab>
50ⲁⲩϫⲓⲙⲟⲉⲓⲧ ϩⲏⲧⲥ ⲛⲧⲉϥⲟⲣⲅⲏ ⲙⲡϥϯⲥⲟⲛⲉⲩⲯⲩⲭⲏ ⲉⲡⲙⲟⲩ ⲁⲩⲱ ⲛⲉⲩⲧⲃⲛⲟⲟⲩⲉ ⲁϥⲧⲟⲩⲏⲧⲟⲩ ⲉⲡⲙⲟⲟⲩⲧⲟⲩ</ab>
51ⲁϥⲡⲁⲧⲁⲥⲥⲉ ⲛϣⲣⲡ ⲙⲙⲓⲥⲉ ⲛⲓⲙ ⲛⲛⲣⲙⲛⲕⲏⲙⲉ ⲧⲁⲡⲁⲣⲭⲏ ⲛⲛⲉⲩϩⲓⲥⲉ ϩⲛ ⲙⲙⲁ ⲛϣⲱⲡⲉ ⲛⲭⲁⲙ</ab>
52ⲁϥⲡⲉⲛⲉⲡⲉϥⲗⲁⲟⲥ ⲉⲃⲟⲗ ⲛⲑⲉ ⲛϩⲉⲛⲉⲥⲟⲟⲩ ⲁϥⲛⲧⲟⲩ ⲉⲃⲟⲗ ϩⲓ ⲡϫⲁⲓⲉ ⲛⲑⲉ ⲛⲟⲩⲟϩⲉ</ab>
53ⲁϥϫⲓⲙⲟⲉⲓⲧ ϩⲏⲧⲟⲩ ϩⲛ ⲟⲩϩⲉⲗⲡⲓⲥ ⲁⲩⲱ ⲙⲡⲟⲩⲣϭⲱⲃ ⲁⲑⲁⲗⲁⲥⲥⲁ ϩⲱⲃⲥ ⲉϫⲛ ⲛⲉⲩϫⲓϫⲉⲉⲩ</ab>
54ⲁϥϫⲓⲧⲟⲩ ⲉϩⲟⲩⲛ ⲉⲡⲉϥⲧⲟⲟⲩ ⲉⲧⲟⲩⲁⲁⲃ ⲡⲉⲓⲧⲟⲟⲩ ⲛⲧⲁⲧⲉϥⲟⲩⲛⲁⲙ ϫⲡⲟϥ ⲛⲁⲥ</ab>
55ⲁϥⲛⲟⲩϫⲉ ⲛϩⲉⲛϩⲉⲑⲛⲟⲥ ⲉⲃⲟⲗ ϩⲁ ⲧⲉⲩϩⲏ ⲁϥϯⲕⲗⲏⲣⲟⲥ ⲛⲁⲩ ϩⲛ ⲟⲩⲛⲟⲩϩ ⲛϯⲕⲗⲏⲣⲟⲥ ⲁϥϯ ⲛⲛⲉⲩⲙⲁ ⲛϣⲱⲡⲉ ⲉⲟⲩⲱϩ ⲛϩⲏⲧⲟⲩ ⲛⲛⲉⲫⲩⲗⲏ ⲙⲡⲓ︤ⲏ︦ⲗ︥</ab>
56ⲁⲩⲱ ⲟⲛ ⲁⲩⲡⲉⲓⲣⲁⲍⲉ ⲁⲩϯⲛⲟⲩϭⲥ ⲙⲡⲛⲟⲩⲧⲉ ⲉⲧϫⲟⲥⲉ ⲙⲡⲟⲩϩⲁⲣⲉϩ ⲉⲛⲉϥⲙⲛⲧⲙⲛⲧⲣⲉ</ab>
57ⲁⲩⲥⲁϩⲱⲟⲩ ⲉⲃⲟⲗ ⲁⲩϣⲧⲟⲣⲧⲣ ⲛⲑⲉ ⲛⲛⲉⲩⲕⲉⲉⲓⲟⲧⲉ ⲁⲩⲕⲧⲟⲟⲩ ⲉⲩⲡⲓⲧⲉ ⲉⲥϭⲟⲟⲙⲉ</ab>
58ⲁⲩϯⲛⲟⲩϭⲥ ⲛⲁϥ ϩⲛ ⲛⲉⲩⲥⲓⲃⲧ ⲁⲩϯⲕⲱϩ ⲛⲁϥ ϩⲛ ⲛⲉⲩⲙⲟⲩⲛⲅ ⲛϭⲓϫ</ab>
59ⲁⲡⲛⲟⲩⲧⲉ ⲥⲱⲧⲙ ⲁϥⲟⲃϣϥ ⲁϥⲥⲉϣϥ ⲡⲓ︤ⲏ︦ⲗ︥ ⲉⲙⲁⲧⲉ</ab>
60ⲁϥⲕⲱ ⲛⲥⲱϥ ⲙⲡⲙⲁ ⲛϣⲱⲡⲉ ⲛⲥⲏⲗⲱⲙ ⲡⲉϥⲙⲁ ⲛⲧⲁϥⲟⲩⲱϩ ⲛϩⲏⲧϥ ⲙⲛ ⲛⲣⲱⲙⲉ</ab>
61ⲁϥϯ ⲛⲧⲉⲩϭⲟⲙ ⲉⲩⲁⲓⲭⲙⲁⲗⲱⲥⲓⲁ ⲁⲩⲱ ⲧⲉⲩⲙⲛⲧⲥⲱⲧⲡ ⲉⲧϭⲓϫ ⲙⲡϫⲁϫⲉ</ab>
62ⲁϥⲧⲟⲟⲩⲧⲉ ⲙⲡⲉϥⲗⲁⲟⲥ ⲉϩⲟⲩⲛ ⲉⲧⲥⲏϥⲉ ⲁⲩⲱ ⲁϥⲟⲃϣϥ ⲉⲧⲉϥⲕⲗⲏⲣⲟⲛⲟⲙⲓⲁ</ab>
63ⲁⲡⲕⲱϩⲧ ⲟⲩⲱⲙ ⲛⲛⲉⲩϩⲣϣⲓⲣⲉ ⲁⲩⲱ ⲙⲡⲉⲛⲉⲩⲡⲁⲣⲑⲉⲛⲟⲥ ⲣϩⲏⲃⲉ</ab>
64ⲁⲛⲉⲩⲟⲩⲏⲏⲃ ϩⲉ ϩⲛ ⲧⲥⲏϥⲉ ⲁⲩⲱ ⲙⲡⲉⲛⲉⲩⲭⲏⲣⲁ ⲣⲓⲙⲉ</ab>
65ⲁⲡϫⲟⲉⲓⲥ ⲧⲱⲟⲩⲛ ⲛⲑⲉ ⲙⲡⲉⲧⲟⲃϣ ⲛⲑⲉ ⲛⲟⲩϫⲱⲱⲣⲉ ⲁϥϯϩⲉ ϩⲁ ⲡⲏⲣⲡ</ab>
66ⲁϥⲡⲁⲧⲁⲥⲥⲉ ⲛⲛⲉϥϫⲓϫⲉⲉⲩ ⲉⲡⲁϩⲟⲩ ⲁϥⲧⲁⲁⲩ ⲛⲛⲟϭⲛⲉϭ ⲛϣⲁ ⲉⲛⲉϩ</ab>
67ⲁϥⲕⲱ ⲛⲥⲱϥ ⲙⲡⲙⲁ ⲛϣⲱⲡⲉ ⲛⲓⲱⲥⲏⲫ ⲙⲡϥⲥⲱⲧⲡ ⲛⲧⲉⲫⲩⲗⲏ ⲛⲉⲫⲣⲁⲓⲙ</ab>
68ⲁϥⲥⲱⲧⲡ ⲛⲧⲉⲫⲩⲗⲏ ⲛⲓⲟⲩⲇⲁ ⲡⲧⲟⲟⲩ ⲛⲥⲓⲱⲛ ⲡⲉⲛⲧⲁϥⲙⲉⲣⲓⲧϥ</ab>
69ⲁϥⲕⲱⲧ ⲙⲡⲉϥⲙⲁ ⲉⲧⲟⲩⲁⲁⲃ ⲛⲑⲉ ⲙⲡⲁ ⲡⲧⲁⲡ ⲛⲟⲩⲱⲧ ⲁϥⲥⲙⲛⲥⲛⲧⲉ ⲙⲙⲟϥ ϩⲓϫⲙ ⲡⲕⲁϩ ⲛϣⲁ ⲉⲛⲉϩ</ab>
70ⲁϥⲥⲱⲧⲡ ⲛⲇⲁⲩⲉⲓⲇ ⲡⲉϥϩⲙϩⲁⲗ ⲁϥϫⲓⲧϥ ⲉⲃⲟⲗ ϩⲛ ⲛⲟϩⲉ ⲛⲉⲥⲟⲟⲩ</ab>
71ⲁϥϥⲓⲧϥ ϩⲓⲡⲁϩⲟⲩ ⲛⲛⲉⲧⲙⲟⲥⲉ ⲉⲙⲟⲟⲛⲉ ⲛⲓⲁⲕⲱⲃ ⲡⲉϥⲗⲁⲟⲥ ⲁⲩⲱ ⲡⲓ︤ⲏ︦ⲗ︥ ⲧⲉϥⲕⲗⲏⲣⲟⲛⲟⲙⲓⲁ</ab>
72ⲁϥⲙⲟⲟⲛⲉ ⲙⲙⲟⲟⲩ ϩⲛ ⲧⲙⲛⲧⲃⲁⲗϩⲏⲧ ⲙⲡⲉϥϩⲏⲧ ⲁϥϫⲓⲙⲟⲉⲓⲧ ϩⲏⲧⲟⲩ ϩⲛ ⲧⲙⲛⲧⲣⲙⲛϩⲏⲧ ⲛⲛⲉϥϭⲓϫ</ab>