1ⲡⲁⲇⲁⲩⲉⲓⲇ ϯϩⲁⲡ ⲡϫⲟⲉⲓⲥ ⲉⲛⲉⲧϫⲓ ⲙⲙⲟⲓ ⲛϭⲟⲛⲥ ⲙⲓϣⲉ ⲙⲛ ⲛⲉⲧⲙⲓϣⲉ ⲛⲙⲙⲁⲓ</ab>
2ⲁⲙⲁϩⲧⲉ ⲛⲟⲩϩⲟⲡⲗⲟⲛ ⲙⲛ ⲟⲩⲑⲩⲣⲱⲛ ⲛⲅⲧⲱⲟⲩⲛ ⲉⲃⲟⲏⲑⲉⲓ ⲉⲣⲟⲓ</ab>
3ⲡⲱϩⲧ ⲛⲟⲩⲥⲏϥⲉ ⲛⲅϩⲟϫⲡⲟⲩ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲑⲗⲓⲃⲉ ⲙⲙⲟⲓ ⲁϫⲓⲥ ⲛⲧⲁⲯⲩⲭⲏ ϫⲉ ⲁⲛⲟⲕ ⲡⲉ ⲡⲟⲩⲥⲱⲧⲏⲣ</ab>
4ⲙⲁⲣⲟⲩϫⲓϣⲓⲡⲉ ⲛⲥⲉⲟⲩⲱⲗⲥ ⲛϭⲓ ⲟⲩⲟⲛ ⲛⲓⲙ ⲉⲧϣⲓⲛⲉ ⲛⲥⲁ ⲧⲁⲯⲩⲭⲏ ⲙⲁⲣⲟⲩⲕⲟⲧⲟⲩ ⲉⲡⲁϩⲟⲩ ⲛⲥⲉϫⲓϣⲓⲡⲉ ⲛϭⲓ ⲛⲉⲧⲙⲉⲉⲩⲉ ⲉⲣⲟⲓ ⲉϩⲉⲛⲡⲉⲑⲟⲟⲩ</ab>
5ⲙⲁⲣⲟⲩϣⲱⲡⲉ ⲛⲑⲉ ⲛⲛⲓϣⲟⲉⲓϣ ⲙⲡⲉⲙⲧⲟ ⲉⲃⲟⲗ ⲙⲡⲧⲏⲩ ⲉⲣⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲑⲗⲓⲃⲉ ⲙⲙⲟⲟⲩ</ab>
6ⲙⲁⲣⲉⲧⲉⲩϩⲓⲏ ⲣⲕⲁⲕⲉ ⲛⲥⲥⲗⲁⲁⲧⲉ ⲛⲁⲩ ⲉⲣⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲡⲏⲧ ⲛⲥⲱⲟⲩ</ab>
7ϫⲉ ⲁⲩϩⲱⲡ ⲉⲣⲟⲓ ⲛⲟⲩϭⲟⲣϭⲥ ⲉⲡϫⲓⲛϫⲏ ⲉⲡⲉⲩⲧⲁⲕⲟ ⲁⲩⲛⲟϭⲛⲉϭ ⲛⲧⲁⲯⲩⲭⲏ ⲉⲡϫⲓⲛϫⲏ</ab>
8ⲙⲁⲣⲉⲟⲩϭⲟⲣϭⲥ ⲉⲓ ⲛⲁⲩ ⲉⲛⲥⲉⲥⲟⲟⲩⲛ ⲙⲙⲟⲥ ⲁⲛ ⲁⲩⲱ ⲡⲡⲁϣⲉ ⲛⲧⲁⲩϩⲟⲡϥ ⲙⲁⲣⲉϥϭⲟⲡⲟⲩ ϩⲣⲁⲓ ϩⲛ ⲧϭⲟⲣϭⲥ ⲥⲉⲛⲁϩⲉ ϩⲣⲁⲓ ⲛϩⲏⲧⲥ</ab>
9ⲧⲁⲯⲩⲭⲏ ⲛⲧⲟⲥ ⲛⲁⲧⲉⲗⲏⲗ ⲉϫⲙ ⲡϫⲟⲉⲓⲥ ⲁⲩⲱ ⲥⲛⲁⲟⲩⲛⲟϥ ⲉϫⲙ ⲡⲉϥⲟⲩϫⲁⲓ</ab>
10ⲛⲁⲕⲉⲉⲥ ⲧⲏⲣⲟⲩ ⲛⲁϫⲟⲟⲥ ϫⲉ ⲡϫⲟⲉⲓⲥ ⲛⲓⲙ ⲡⲉⲧⲉⲓⲛⲉ ⲙⲙⲟⲕ ⲡⲉⲧⲛⲟⲩϩⲙ ⲛⲟⲩϩⲏⲕⲉ ⲉⲃⲟⲗ ϩⲛ ⲧϭⲓϫ ⲛⲛⲉⲧϫⲟⲟⲣ ⲉⲣⲟϥ ⲟⲩϩⲏⲕⲉ ⲙⲛ ⲟⲩⲉⲃⲓⲏⲛ ⲉⲃⲟⲗ ϩⲓⲧⲛ ⲛⲉⲧⲧⲱⲣⲡ ⲙⲙⲟϥ</ab>
11ⲁⲩⲧⲱⲟⲩⲛ ⲉⲣⲟⲓ ⲛϭⲓ ϩⲉⲛⲙⲛⲧⲣⲉ ⲛϫⲓϭⲟⲛⲥ ⲁⲩϫⲛⲟⲩⲓ ⲉⲛⲉⲧⲉⲛϯⲥⲟⲟⲩⲛ ⲙⲙⲟⲟⲩ ⲁⲛ</ab>
12ⲁⲩⲧⲱⲱⲃⲉ ⲛⲁⲓ ⲛϩⲉⲛⲡⲉⲑⲟⲟⲩ ⲉⲡⲙⲁ ⲛϩⲉⲛⲡⲉⲧⲛⲁⲛⲟⲩⲟⲩ ⲁⲩⲱ ⲟⲩⲙⲛⲧⲁⲧϣⲏⲣⲉ ⲛⲧⲁⲯⲩⲭⲏ</ab>
13ⲁⲛⲟⲕ ⲇⲉ ϩⲙ ⲡⲧⲣⲉⲩⲉⲛⲱⲭⲗⲉⲓ ⲛⲁⲓ ⲁⲓϯϩⲓⲱⲱⲧ ⲛⲟⲩϭⲟⲟⲩⲛⲉ ⲛⲉⲓⲑⲃⲃⲓⲟ ⲛⲧⲁⲯⲩⲭⲏ ϩⲛ ⲟⲩⲛⲏⲥⲧⲓⲁ ⲁⲩⲱ ⲡⲁϣⲗⲏⲗ ⲛⲁⲕⲟⲧϥ ⲉϩⲣⲁⲓ ⲉⲕⲟⲩⲟⲩⲛⲧ</ab>
14ⲛⲉⲓⲣⲁⲛⲁⲕ ⲛⲑⲉ ⲙⲡⲉⲧϩⲓⲧⲟⲩⲱⲓ ⲙⲛ ⲟⲩⲥⲟⲛ ⲛⲉⲓⲑⲃⲃⲓⲏⲩ ⲛⲑⲉ ⲙⲡⲉⲧⲣϩⲏⲃⲉ ⲁⲩⲱ ⲡⲉⲧⲟⲕⲙ</ab>
15ⲁⲩⲥⲱⲟⲩϩ ⲉⲣⲟⲓ ⲁⲩⲱ ⲁⲩⲉⲩⲫⲣⲁⲛⲉ ⲁϩⲉⲛⲙⲁⲥⲧⲓⲝ ⲥⲱⲟⲩϩ ⲉⲣⲟⲓ ⲁⲩⲱ ⲛⲡⲓⲉⲓⲙⲉ ⲁⲩϫⲱⲱⲣⲉ ⲉⲃⲟⲗ ⲁⲩⲱ ⲙⲡⲟⲩⲙⲕⲁϩ ⲛϩⲏⲧ</ab>
16ⲁⲩⲡⲉⲓⲣⲁⲍⲉ ⲙⲙⲟⲓ ⲁⲩⲕⲱⲙϣ ⲛⲥⲱⲓ ϩⲛ ⲟⲩⲕⲱⲙϣ ⲁⲩϩⲣⲟϫⲣⲉϫ ⲛⲛⲉⲩⲟⲃϩⲉ ⲉϩⲣⲁⲓ ⲉϫⲱⲓ</ab>
17ⲡϫⲟⲉⲓⲥ ⲉⲕⲛⲁϭⲱϣⲧ ⲧⲛⲁⲩ ⲧⲁϩⲉⲧⲁⲯⲩⲭⲏ ⲉⲣⲁⲧⲥ ⲉⲃⲟⲗ ϩⲙ ⲡⲉⲩϣⲟϫⲛⲉ ⲉⲑⲟⲟⲩ ⲧⲁⲙⲛⲧϣⲏⲣⲉ ⲛⲟⲩⲱⲧ ⲉⲃⲟⲗ ϩⲓⲧⲛ ⲙⲙⲟⲩⲓ</ab>
18ϯⲛⲁⲟⲩⲱⲛϩ ⲛⲁⲕ ⲉⲃⲟⲗ ⲡϫⲟⲉⲓⲥ ϩⲛ ⲟⲩⲛⲟϭ ⲛⲉⲕⲕⲗⲏⲥⲓⲁ ϯⲛⲁⲥⲙⲟⲩ ⲉⲣⲟⲕ ϩⲛ ⲟⲩⲗⲁⲟⲥ ⲉϥⲟϣ</ab>
19ⲙⲡⲣⲧⲣⲉⲩⲣⲁϣⲉ ⲙⲙⲟⲓ ⲛϭⲓ ⲛⲉⲧⲟⲛϫⲁϫⲉ ⲉⲣⲟⲓ ϩⲛ ⲟⲩϫⲓⲛϭⲟⲛⲥ ⲛⲉⲧⲙⲟⲥⲧⲉ ⲙⲙⲟⲓ ⲛϫⲓⲛϫⲏ ⲉⲧϫⲱⲣⲙ ⲛⲛⲉⲩⲃⲁⲗ</ab>
20ϫⲉ ⲛⲉⲩϫⲱ ⲙⲉⲛ ⲛⲁⲓ ⲛϩⲉⲛϣⲁϫⲉ ⲛⲉⲓⲣⲏⲛⲏ ⲉⲩⲙⲉⲉⲩⲉ ⲇⲉ ⲉϩⲉⲛⲕⲣⲟϥ ϩⲛ ⲟⲩⲟⲣⲅⲏ</ab>
21ⲁⲩⲟⲩⲱⲛ ⲛⲣⲱⲟⲩ ⲉϩⲣⲁⲓ ⲉϫⲱⲓ ⲁⲩⲱ ⲡⲉϫⲁⲩ ϫⲉ ⲉϩⲉ ⲉϩⲉ ⲁⲛⲙⲉϩⲉⲓⲁⲧⲛ ⲙⲙⲟϥ</ab>
22ⲁⲕⲛⲁⲩ ⲡϫⲟⲉⲓⲥ ⲙⲡⲣⲕⲁⲣⲱⲕ ⲡϫⲟⲉⲓⲥ ⲙⲡⲣⲟⲩⲉ ⲙⲙⲟⲓ</ab>
23ⲧⲱⲟⲩⲛ ⲡϫⲟⲉⲓⲥ ϯϩⲧⲏⲕ ⲉⲡⲁϩⲁⲡ ⲡⲁⲛⲟⲩⲧⲉ ⲁⲩⲱ ⲡⲁϫⲟⲉⲓⲥ ⲉⲡⲁⲕⲃⲁ</ab>
24ⲕⲣⲓⲛⲉ ⲙⲙⲟⲓ ⲕⲁⲧⲁ ⲉⲕⲇⲓⲕⲁⲓⲟⲥⲩⲛⲏ ⲡϫⲟⲉⲓⲥ ⲡⲁⲛⲟⲩⲧⲉ ⲙⲡⲣⲧⲣⲉⲩⲣⲁϣⲉ ⲙⲙⲟⲓ</ab>
25ⲙⲡⲣⲧⲣⲉⲩϫⲟⲟⲥ ϩⲙ ⲡⲉⲩϩⲏⲧ ϫⲉ ⲕⲁⲗⲱⲥ ⲛⲧⲉⲛⲯⲩⲭⲏ ⲁⲩⲱ ⲙⲡⲣⲧⲣⲉⲩϫⲟⲟⲥ ϫⲉ ⲁⲛⲟⲙⲕϥ</ab>
26ⲉⲩⲉϫⲓϣⲓⲡⲉ ⲛⲥⲉⲟⲩⲱⲗⲥ ϩⲓ ⲟⲩⲥⲟⲡ ⲛϭⲓ ⲛⲉⲧⲣⲁϣⲉ ⲉϫⲛ ⲛⲁⲡⲉⲑⲟⲟⲩ ⲙⲁⲣⲟⲩϯ ϩⲓⲱⲟⲩ ⲛⲟⲩϣⲓⲡⲉ ⲙⲛ ⲟⲩⲟⲩⲱⲗⲥ ⲛϭⲓ ⲛⲉⲧϫⲉⲛⲟϭ ⲛϣⲁϫⲉ ⲉϩⲣⲁⲓ ⲉϫⲱⲓ</ab>
27ⲙⲁⲣⲟⲩⲧⲉⲗⲏⲗ ⲛⲧⲟⲟⲩ ⲛⲥⲉⲟⲩⲛⲟϥ ⲛϭⲓ ⲛⲉⲧⲟⲩⲉϣⲧⲁⲇⲓⲕⲁⲓⲟⲥⲩⲛⲏ ⲛⲥⲉϫⲟⲟⲥ ⲛⲟⲩⲟⲉⲓϣ ⲛⲓⲙ ϫⲉ ⲉⲣⲉⲡϫⲟⲉⲓⲥ ⲁⲓⲁⲓ ⲛⲉⲧⲟⲩⲉϣϯⲣⲏⲛⲏ ⲙⲡⲉϥϩⲙϩⲁⲗ</ab>
28ⲁⲩⲱ ⲡⲁⲗⲁⲥ ⲛⲁⲧⲉⲗⲏⲗ ϩⲛ ⲧⲉⲕⲇⲓⲕⲁⲓⲟⲥⲩⲛⲏ ⲙⲛ ⲡⲉⲕⲧⲁⲉⲓⲟ ⲙⲡⲉϩⲟⲟⲩ ⲧⲏⲣϥ</ab>