1ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲛⲧⲉⲣⲉⲡⲉϥϣⲏⲣⲉ ⲡⲱⲧ ⲛⲥⲱϥ ⲡϫⲟⲉⲓⲥ ⲥⲱⲧⲙ ⲉⲡⲁϣⲗⲏⲗ ϫⲓⲥⲙⲏ ⲉⲡⲁⲥⲟⲡⲥ ϩⲛ ⲧⲉⲕⲙⲉ ⲥⲱⲧⲙ ⲉⲣⲟⲓ ϩⲛ ⲧⲉⲕⲇⲓⲕⲁⲓⲟⲥⲩⲛⲏ</ab>
2ⲛⲅⲧⲙⲉⲓ ⲉϩⲟⲩⲛ ⲉϫⲓϩⲁⲡ ⲙⲛ ⲡⲉⲕϩⲙϩⲁⲗ ϫⲉ ⲙⲛⲗⲁⲁⲩ ⲛⲣⲱⲙⲉ ⲛⲁⲧⲙⲁⲉⲓⲟ ⲙⲡⲉⲕⲙⲧⲟ ⲉⲃⲟⲗ</ab>
3ϫⲉ ⲁⲡϫⲁϫⲉ ⲡⲱⲧ ⲛⲥⲁ ⲧⲁⲯⲩⲭⲏ ⲁϥⲑⲃⲃⲓⲟ ⲙⲡⲁⲱⲛϩ ⲉϩⲣⲁⲓ ⲉⲡⲕⲁϩ ⲁϥⲑⲃⲃⲓⲟⲓ ϩⲛ ϩⲉⲛⲙⲁ ⲛⲕⲁⲕⲉ ⲛⲑⲉ ⲛϩⲉⲛⲕⲱⲱⲥ ⲛϣⲁ ⲉⲛⲉϩ</ab>
4ⲁⲩⲱ ⲁⲩⲗⲩⲡⲉⲓ ⲛϭⲓ ⲡⲁⲡⲛⲉⲩⲙⲁ ⲁⲡⲁϩⲏⲧ ϣⲧⲟⲣⲧⲣ ⲛϩⲏⲧ</ab>
5ⲁⲓⲣⲡⲙⲉⲉⲩⲉ ⲛⲛⲉϩⲟⲟⲩ ⲛϣⲟⲣⲡ ⲁⲓⲙⲉⲗⲉⲧⲁ ⲛⲛⲉⲕϩⲃⲏⲩⲉ ⲧⲏⲣⲟⲩ ⲁⲓⲙⲉⲗⲉⲧⲁ ⲛⲛⲉⲕϩⲃⲏⲩⲉ ⲛⲛⲉⲕϭⲓϫ</ab>
6ⲁⲓⲡⲱⲣϣ ⲛⲛⲁϭⲓϫ ⲉϩⲣⲁⲓ ⲉⲣⲟⲕ ⲁⲧⲁⲯⲩⲭⲏ ⲣⲑⲉ ⲛⲛⲓⲕⲁϩ ⲉⲧⲟⲃⲉ ⲛⲛⲁϩⲣⲁⲕ ⲇⲓⲁⲯⲁⲗⲙⲁ</ab>
7ⲥⲱⲧⲙ ⲉⲣⲟⲓ ⲡϫⲟⲉⲓⲥ ϩⲛ ⲟⲩϭⲉⲡⲏ ϫⲉ ⲁⲡⲁⲡⲛⲉⲩⲙⲁ ⲱϫⲛ ⲙⲡⲣⲕⲱⲧⲉ ⲙⲡⲉⲕϩⲟ ⲛⲥⲁⲃⲟⲗ ⲙⲙⲟⲓ ⲧⲁⲣⲑⲉ ⲛⲛⲉⲧⲃⲏⲕ ⲉⲡⲉⲥⲏⲧ ⲉⲡϣⲏⲓ</ab>
8ⲙⲁⲣⲓⲥⲱⲧⲙ ⲉⲡⲉⲕⲛⲁ ⲙⲡⲛⲁⲩ ⲛϣⲱⲣⲡ ϫⲉ ⲁⲓϩⲉⲗⲡⲓⲍⲉ ⲉⲣⲟⲕ ⲙⲁⲧⲁⲙⲟⲓ ⲡϫⲟⲉⲓⲥ ⲉⲧⲉϩⲓⲏ ⲉϯⲛⲁⲃⲱⲕ ⲛϩⲏⲧⲥ ϫⲉ ⲁⲓϥⲓ ⲉϩⲣⲁⲓ ⲉⲣⲟⲕ ⲛⲧⲁⲯⲩⲭⲏ</ab>
9ⲙⲁⲧⲟⲩϫⲟⲓ ⲉⲛⲁϫⲁϫⲉ ⲡϫⲟⲉⲓⲥ ϫⲉ ⲁⲓⲡⲱⲧ ⲉⲣⲁⲧⲕ</ab>
10ⲙⲁⲧⲥⲁⲃⲟⲓ ⲉⲧⲣⲁⲣⲡⲉⲕⲟⲩⲱϣ ϫⲉ ⲛⲧⲟⲕ ⲡⲉ ⲡⲁⲛⲟⲩⲧⲉ ⲡⲉⲕⲡⲛⲉⲩⲙⲁ ⲉⲧⲛⲁⲛⲟⲩϥ ⲛⲁϫⲓⲙⲟⲉⲓⲧ ϩⲏⲧ ϩⲛ ⲟⲩⲥⲟⲟⲩⲧⲛ</ab>
11ⲕⲛⲁⲧⲁⲛϩⲟⲓ ⲉⲧⲃⲉ ⲡⲉⲕⲣⲁⲛ ⲡϫⲟⲉⲓⲥ ϩⲛ ⲧⲉⲕⲇⲓⲕⲁⲓⲟⲥⲩⲛⲏ ⲕⲛⲁ ⲛⲧⲁⲯⲩⲭⲏ ⲉⲃⲟⲗ ϩⲛ ⲧⲉⲑⲗⲓⲯⲓⲥ</ab>
12ⲕⲛⲁϥⲱⲧⲉ ⲉⲃⲟⲗ ⲛⲛⲁϫⲁϫⲉ ϩⲙ ⲡⲉⲕⲛⲁ ⲕⲛⲁⲧⲁⲕⲉⲟⲩⲟⲛ ⲛⲓⲙ ⲉⲧⲑⲗⲓⲃⲉ ⲛⲧⲁⲯⲩⲭⲏ ϫⲉ ⲁⲛⲅ ⲡⲉⲕϩⲙϩⲁⲗ</ab>