1ⲡϣⲁϫⲉ ⲉⲧⲃⲉ ⲇⲁⲙⲁⲥⲕⲟⲥ ⲉⲓⲥ ϩⲏⲏⲧⲉ ⲥⲉⲛⲁϥⲓ ⲛⲇⲁⲙⲁⲥⲕⲟⲥ ⲉⲃⲟⲗ ϩⲛ ⲙⲡⲟⲗⲓⲥ ⲁⲩⲱ ⲥⲛⲁϣⲱⲡⲉ ⲉⲩϩⲉ</ab>
2ⲉⲁⲩⲕⲁⲁⲥ ⲉⲃⲟⲗ ϣⲁ ⲉⲛⲉϩ ⲉⲩϣⲁⲓⲣⲉ ⲛⲉⲥⲟⲟⲩ ⲁⲩⲱ ⲉⲩⲙⲁ ⲛⲙⲧⲟⲛ ⲛⲉϩⲉ ⲁⲩⲱ ⲛϥⲛⲁϣⲱⲡⲉ ⲁⲛ ⲛϭⲓ ⲡⲉⲧⲡⲏⲧ ⲉⲣⲟⲥ ϫⲓⲛ ⲧⲉⲛⲟⲩ</ab>
3ⲁⲩⲱ ⲛⲥⲛⲁϣⲱⲡⲉ ⲁⲛ ⲉⲥϫⲟⲥⲉ ϫⲓⲛ ⲧⲉⲛⲟⲩ ⲉⲧⲣⲉⲉⲫⲣⲁⲓⲙ ⲡⲱⲧ ⲉⲙⲁⲩ ⲁⲩⲱ ⲙⲛ ⲙⲛⲧⲣⲣⲟ ⲛⲁϣⲱⲡⲉ ϩⲛ ⲇⲁⲙⲁⲥⲕⲟⲥ ϫⲓⲛ ⲧⲉⲛⲟⲩ ⲁⲩⲱ ⲡⲕⲉⲥⲉⲉⲡⲉ ⲛⲧⲉ ⲛⲁⲥⲥⲩⲣⲓⲟⲥ ⲛⲁⲧⲁⲕⲟ ⲛⲉⲣⲉⲥⲟⲧⲡ ⲅⲁⲣ ⲁⲛ ⲛⲧⲟ ⲉⲛϣⲏⲣⲉ ⲙⲡⲓⲏⲗ ⲙⲛ ⲡⲉⲩⲉⲟⲟⲩ</ab>
4ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ϫⲱ ⲙⲙⲟⲟⲩ ϫⲉ ⲟⲩⲛⲟⲩⲱϫⲛ ⲛⲁϣⲱⲡⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲙⲡⲉⲟⲟⲩ ⲛⲓⲁⲕⲱⲃ ⲡⲉϩⲟⲩⲟ ⲙⲡⲉⲩⲉⲟⲟⲩ ⲛⲁⲕⲓⲙ</ab>
5ⲁⲩⲱ ⲥⲛⲁϣⲱⲡⲉ ⲛⲑⲉ ⲛⲟⲩⲁ ⲉϥⲱⲗ ⲛⲟⲩⲱϩⲥ ⲉⲁϥϫⲱⲕ ⲉⲃⲟⲗ ⲁⲩⲱ ⲛϥⲱⲗ ⲙⲡⲉⲥⲡⲉⲣⲙⲁ ⲛⲛϩⲙⲥ ⲁⲩⲱ ⲥⲛⲁϣⲱⲡⲉ ⲛⲑⲉ ⲛⲟⲩⲁ ⲉϥⲱⲗ ⲛϩⲉⲛϩⲙⲥ ϩⲛ ⲟⲩⲉⲓⲁ ⲉϥⲛⲁϣⲧ</ab>
6ⲛⲧⲉⲟⲩⲣⲟⲟⲩⲉ ϣⲱϫⲡ ⲛϩⲏⲧϥ ⲏ ⲛⲑⲉ ⲛϫⲟⲉⲓⲧ ⲥⲛⲁⲩ ⲏ ϣⲙⲛⲧ ϩⲓϫⲛ ⲟⲩⲧⲁⲣ ⲉϥϩⲗⲟⲩⲗⲱⲟⲩ ⲏ ⲛⲧⲉϥⲧⲟⲟⲩ ⲏ ϯⲟⲩ ϣⲱϫⲡ ϩⲣⲁⲓ ϩⲛ ⲛⲉⲩⲧⲁⲣ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲏⲗ ϫⲱ ⲙⲙⲟⲟⲩ</ab>
7ϫⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲡⲣⲱⲙⲉ ⲛⲁϣⲱⲡⲉ ⲉϥⲛⲁϩⲧⲉ ⲉⲡⲉⲛⲧⲁϥⲧⲁⲙⲓⲟϥ ⲁⲩⲱ ⲛⲉⲩⲃⲁⲗ ⲛⲁϭⲱϣⲧ ⲉⲡⲉⲧⲟⲩⲁⲁⲃ ⲙⲡⲓⲏⲗ</ab>
8ⲁⲩⲱ ⲛⲛⲉⲩⲕⲁϩⲧⲏⲩ ⲉⲛⲉⲛⲧⲁⲩϫⲓⲧⲟⲩ ⲛϭⲟⲛⲥ ⲟⲩⲇⲉ ⲉϫⲛ ⲛⲉⲩϣⲏⲩⲉ ⲟⲩⲇⲉ ⲉϫⲛ ⲛⲉϩⲃⲏⲩⲉ ⲛⲛⲉⲩϭⲓϫ ⲛⲉⲛⲧⲁⲛⲉⲩⲧⲏⲏⲃ ⲧⲁⲙⲓⲟⲟⲩ ⲁⲗⲗⲁ ⲥⲉⲛⲁϣⲱⲡⲉ ⲉⲩⲛⲁϩⲧⲉ ⲉⲡⲉⲧⲟⲩⲁⲁⲃ ⲙⲡⲓⲏⲗ ⲁⲩⲱ ⲛⲛⲉⲩⲛⲁⲩ ⲉⲛⲉⲩϣⲏⲛ ⲟⲩⲇⲉ ⲛⲉⲩⲃⲟⲧⲉ</ab>
9ϩⲙ ⲡⲉϩⲟⲟⲩ ⲉⲧⲙⲙⲁⲩ ⲛⲉⲩⲡⲟⲗⲓⲥ ⲛⲁϣⲱⲡⲉ ⲉⲩⲕⲏ ⲉⲃⲟⲗ ⲛⲑⲉ ⲛⲧⲁⲛⲁⲙⲟⲣⲁⲓⲟⲥ ⲙⲛ ⲛⲉⲩϩⲁⲓⲟⲥ ⲕⲁⲛⲟⲩⲟⲩ ⲉⲃⲟⲗ ⲙⲡⲉⲙⲧⲟ ⲉⲃⲟⲗ ⲛⲛⲉϣⲏⲣⲉ ⲙⲡⲓⲏⲗ ⲁⲩⲱ ⲥⲉⲛⲁϣⲱⲡⲉ ⲛϫⲁⲓⲉ</ab>
10ϫⲉ ⲁⲕⲁⲡⲟⲩⲛⲟⲩⲧⲉ ⲛⲥⲱ ⲡⲟⲩⲥⲱⲧⲏⲣ ⲁⲩⲱ ⲙⲡⲉⲣⲡⲙⲉⲉⲩⲉ ⲙⲡⲟⲩϫⲟⲉⲓⲥ ⲉⲧⲃⲉ ⲡⲁⲓ ⲧⲉⲛⲁⲧⲱϭⲉ ⲛⲟⲩⲧⲱϭⲉ ⲛⲁⲡⲓⲥⲧⲟⲛ ⲁⲩⲱ ⲡⲟⲩⲥⲡⲉⲣⲙⲁ ⲛⲁⲧⲛⲁϩⲧⲉ</ab>
11ⲧⲉⲛⲁⲡⲗⲁⲛⲁ ⲇⲉ ϩⲙ ⲡⲉϩⲟⲟⲩ ⲉⲧⲉⲛⲁⲧⲟϭϥ ⲉⲣϣⲁⲛϫⲟϥ ⲇⲉ ⲉϩⲧⲟⲟⲩⲉ ⲉϥⲛⲁϯⲟⲩⲱ ⲉⲡⲟϩⲥϥ ⲙⲡⲉϩⲟⲟⲩ ⲉⲧϥⲛⲁϯⲟⲩⲱ ⲁⲩⲱ ⲛⲑⲉ ⲛϣⲁⲣⲉⲟⲩⲉⲓⲱⲧ ⲡⲱϣ ⲉϫⲛ ⲛⲉϥϣⲏⲣⲉ</ab>
12ⲟⲩⲟⲓ ⲙⲡⲙⲏⲏϣⲉ ⲛⲛϩⲉⲑⲛⲟⲥ ⲉⲧⲟϣ ⲛⲑⲉ ⲛⲑⲁⲗⲁⲥⲥⲁ ⲉⲥϯϩⲟⲉⲓⲙ ⲧⲁⲓ ⲧⲉ ⲑⲉ ⲉⲧⲉⲧⲛⲁϣⲧⲟⲣⲧⲣ ⲁⲩⲱ ⲧϫⲓⲥⲉ ⲛⲟⲩⲙⲏⲏϣⲉ ⲛϩⲉⲑⲛⲟⲥ ⲛⲁⲱϣ ⲉⲃⲟⲗ</ab>
13ⲛⲑⲉ ⲛⲟⲩⲙⲟⲟⲩ ⲉⲛⲁϣⲱϥ ⲉϥⲥⲱⲕ ⲛϭⲟⲛⲥ ⲁⲩⲱ ϥⲛⲁϫⲟⲟⲣⲟⲩ ⲉⲃⲟⲗ ⲁⲩⲱ ϥⲛⲁⲡⲱⲧ ⲛⲥⲱⲟⲩ ⲙⲡⲟⲩⲉ ⲛⲑⲉ ⲛⲟⲩϣϩⲓϭ ⲛⲧⲱϩ ⲛⲛⲉⲧϣⲱϣ ⲙⲡⲉⲙⲧⲟ ⲉⲃⲟⲗ ⲛⲟⲩⲧⲏⲩ ⲁⲩⲱ ⲛⲑⲉ ⲙⲡϣⲟⲉⲓϣ ⲛⲟⲩⲕⲟⲧ ⲉⲣⲉⲟⲩϩⲁⲧⲏⲩ ϥⲓ ⲙⲙⲟϥ</ab>
14ⲙⲡⲛⲟⲩ ⲛⲣⲟⲩϩⲉ ⲁⲩⲱ ⲟⲩⲛⲟⲩϩⲏⲃⲉ ⲛⲁϣⲱⲡⲉ ϩⲁⲑⲏ ⲛϩⲧⲟⲟⲩⲉ ⲛϥⲧⲙⲥⲟⲧϥ ⲉϣⲱⲡⲉ ⲧⲁⲓ ⲧⲉ ⲧⲙⲉⲣⲓⲥ ⲛⲛⲉⲛⲧⲁⲩϣⲗⲧⲏⲩⲧⲛ ⲁⲩⲱ ⲧⲉⲕⲗⲏⲣⲟⲛⲟⲙⲓⲁ ⲛⲛⲉⲛⲧⲁⲩⲕⲗⲏⲣⲟⲛⲟⲙⲉⲓ ⲙⲙⲱⲧⲛ</ab>