1ⲇⲁⲩⲉⲓⲇ ⲇⲉ ⲁϥⲧⲁⲩⲟ ⲉⲡϫⲟⲉⲓⲥ ⲛⲛϣⲁϫⲉ ⲛⲧⲉⲓⲱⲇⲏ ϩⲙ ⲡⲉϩⲟⲟⲩ ⲛⲧⲁⲡϫⲟⲉⲓⲥ ⲛⲁϩⲙⲉϥ ⲛⲧⲟⲟⲧⲟⲩ ⲛⲛⲉϥϫⲁϫⲉ ⲧⲏⲣⲟⲩ ⲁⲩⲱ ⲛⲧⲟⲟⲧϥ ⲛⲥⲁⲟⲩⲗ</ab>
2ⲉϥϫⲱ ⲙⲙⲟⲥ ϫⲉ ⲡϫⲟⲉⲓⲥ ⲛⲧⲟⲕ ⲡⲉ ⲡⲁⲧⲁϫⲣⲟ ⲁⲩⲱ ⲡⲁⲙⲁ ⲙⲡⲱⲧ ⲉϥⲛⲟⲩϩⲙ ⲙⲙⲟⲓ</ab>
3ⲡⲁⲛⲟⲩⲧⲉ ⲡⲉ ⲡⲁⲟⲩⲟⲉⲓⲛ ⲛⲧⲟϥ ⲡⲉⲧⲛⲁϩⲁⲣⲉϩ ⲉⲣⲟⲓ ϯⲛⲁϣⲱⲡⲉ ⲉⲓⲕⲱ ⲛϩⲧⲏⲓ ⲉⲣⲟϥ ⲛⲧⲟϥ ⲡⲉ ⲧⲁⲛⲁϣⲧⲉ ⲁⲩⲱ ⲡⲧⲁⲡ ⲙⲡⲁⲟⲩϫⲁⲓ ⲡⲁⲣⲉϥϣⲟⲡⲧ ⲉⲣⲟϥ ⲛⲧⲟϥ ⲡⲉ ⲡⲙⲁ ⲙⲡⲱⲧ ⲙⲡⲁⲟⲩϫⲁⲓ ⲉϥⲛⲁⲛⲁϩⲙⲉⲧ ⲛⲧⲟⲟⲧϥ ⲙⲡⲣⲉϥϫⲓⲛϭⲟⲛⲥ</ab>
4ⲡϫⲟⲉⲓⲥ ⲥⲙⲁⲙⲁⲁⲧ ϯⲛⲁⲉⲡⲓⲕⲁⲗⲉⲓ ⲙⲙⲟϥ ⲁⲩⲱ ϯⲛⲁⲛⲟⲩϩⲙ ⲛⲧⲟⲟⲧⲟⲩ ⲛⲛⲁϫⲁϫⲉ</ab>
5ϫⲉ ⲁⲩⲁϩⲉⲣⲁⲧⲟⲩ ⲉⲣⲟⲓ ⲛϭⲓ ⲙⲙⲟⲕϩⲥ ⲙⲡⲙⲟⲩ ⲁⲩⲱ ⲙⲙⲟⲩ ⲛⲥⲱⲣⲙ ⲛⲧⲁⲁⲛⲟⲙⲓⲁ ⲁⲩⲑⲉⲣϣⲁⲓ</ab>
6ⲛⲛⲁⲁⲕⲉ ⲛⲁⲙⲛⲧⲉ ⲁⲩⲕⲱⲧⲉ ⲉⲣⲟⲓ ⲁⲩⲱ ⲁⲩⲁϩⲉⲣⲁⲧⲟⲩ ⲉⲣⲟⲓ ⲛϭⲓ ⲛϭⲟⲣϭⲥ ⲙⲡⲙⲟⲩ</ab>
7ϩⲙ ⲡⲧⲣⲁⲑⲗⲓⲃⲉ ϯⲛⲁⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲁⲩⲱ ϯⲛⲁⲱϣ ⲉⲃⲟⲗ ⲉϩⲣⲁⲓ ⲉⲡⲁⲛⲟⲩⲧⲉ ⲛϥⲥⲱⲧⲙ ⲉⲡⲁϩⲣⲟⲟⲩ ⲉⲃⲟⲗ ϩⲙ ⲡⲉϥⲣⲡⲉ ⲉⲧⲟⲩⲁⲁⲃ ⲁⲩⲱ ⲡⲁⲁϣⲕⲁⲕ ϩⲛ ⲛⲉϥⲙⲁⲁϫⲉ</ab>
8ⲁϥϭⲱϣⲧ ⲉϫⲙ ⲡⲕⲁϩ ⲁⲩⲱ ⲁϥⲛⲟⲉⲓⲛ ⲁⲩⲱ ⲛⲥⲛⲧⲉ ⲛⲧⲡⲉ ⲁⲩϣⲧⲟⲣⲧⲣ ϫⲉ ⲁⲡϫⲟⲉⲓⲥ ϭⲱⲛⲧ ⲉⲣⲟⲟⲩ</ab>
9ⲟⲩⲕⲁⲡⲛⲟⲥ ⲁϥⲉⲓ ⲉϩⲣⲁⲓ ϩⲛ ⲧⲉϥⲟⲣⲅⲏ ⲁⲩⲱ ⲟⲩⲥⲁⲧⲉ ⲉⲃⲟⲗ ϩⲛ ⲧⲉϥⲧⲁⲡⲣⲟ ⲥⲛⲁⲟⲩⲱⲙ ϩⲉⲛϫⲃⲃⲉⲥ ⲁⲩⲙⲟⲩϩ ⲉⲃⲟⲗ ϩⲓⲧⲟⲟⲧϥ</ab>
10ⲙⲡⲏⲩⲉ ⲁϥⲣⲁⲕⲧⲟⲩ ⲁϥⲉⲓ ⲉⲡⲉⲥⲏⲧ ⲟⲩϭⲟⲥⲙ ⲉϥϣⲟⲟⲡ ϩⲁ ⲛⲉϥⲟⲩⲉⲣⲏⲧⲉ</ab>
11ⲁϥϩⲙⲟⲟⲥ ϩⲓϫⲛ ⲛⲉⲭⲁⲓⲣⲟⲩⲃⲓⲛ ⲁϥϩⲱⲗ ⲉⲃⲟⲗ ⲁⲩⲱ ⲁϥⲟⲩⲱⲛϩ ⲉⲃⲟⲗ ϩⲓϫⲛ ⲛⲉⲧⲛϩ ⲙⲡⲧⲏⲩ</ab>
12ⲁϥⲕⲱ ⲛⲟⲩⲕⲁⲕⲉ ϩⲓϩⲏ ⲙⲙⲟϥ ⲧⲉϥⲥⲕⲏⲛⲏ ⲉⲥϣⲟⲟⲡ ϩⲙ ⲡⲉϥⲕⲱⲧⲉ ϩⲛⲙⲟⲟⲩ ⲛⲕⲁⲕⲉ ⲁⲩⲟⲩⲙⲟⲧ ⲏ ⲁⲩⲁϣⲁⲓ ϩⲛ ⲛⲉⲕⲗⲟⲟⲗⲉ ⲛⲁⲏⲣ</ab>
13ⲉⲃⲟⲗ ϩⲙ ⲡⲉϥⲟⲩⲟⲉⲓⲛ ⲛⲉⲕⲗⲟⲟⲗⲉ ⲁⲩⲙⲟⲟϣⲉ ϩⲓϩⲏ ⲙⲙⲟϥ ϩⲛϫⲃⲃⲉⲥ ⲛⲥⲁⲧⲉ ⲁⲩⲙⲟⲩϩ</ab>
14ⲡϫⲟⲉⲓⲥ ⲁϥϯϩⲣⲟⲩⲃⲁⲓ ⲉⲃⲟⲗ ϩⲛ ⲧⲡⲉ ⲁⲩⲱ ⲡⲡⲉⲧϫⲟⲥⲉ ⲁϥϯ ⲙⲡⲉϥϩⲣⲟⲟⲩ</ab>
15ⲁϥϫⲟⲟⲩ ⲉⲃⲟⲗ ⲛⲛⲉϥⲥⲟⲧⲉ ⲁⲩⲱ ⲁϥϫⲟⲟⲣⲟⲩ ⲉⲃⲟⲗ ϩⲛⲉⲃⲣⲏϭⲉ ⲁϥⲧⲁϣⲟⲟⲩ ⲁⲩⲱ ⲁϥϣⲧⲣⲧⲱⲣⲟⲩ</ab>
16ⲁⲩⲟⲩⲱⲛϩ ⲉⲃⲟⲗ ⲛϭⲓ ϩⲉⲛⲡⲏⲅⲏ ⲙⲙⲟⲟⲩ ⲁⲩⲱ ⲁⲩϭⲱⲗⲡ ⲉⲃⲟⲗ ⲛϭⲓ ⲛⲥⲛⲧⲉ ⲛⲧⲟⲓⲕⲟⲩⲙⲉⲛⲏ ϩⲛ ⲑⲟⲧⲉ ⲙⲡϫⲟⲉⲓⲥ ⲉⲃⲟⲗ ϩⲙ ⲡⲛⲓϥⲉ ⲙⲡⲉ ⲛⲧⲉϥⲟⲣⲅⲏ</ab>
17ⲁϥⲧⲛⲛⲟⲟⲩ ⲉⲃⲟⲗ ϩⲙ ⲡϫⲓⲥⲉ ⲁϥϫⲓⲧ ⲁϥϣⲟⲡⲧ ⲉⲣⲟϥ ⲉⲃⲟⲗ ϩⲛ ϩⲉⲛⲙⲟⲟⲩ ⲉⲛⲁϣⲱⲟⲩ</ab>
18ⲁϥⲛⲁϩⲙⲉⲧ ⲛⲧⲟⲟⲧⲟⲩ ⲛⲛⲁϫⲁϫⲉ ⲉⲧϭⲙϭⲟⲙ ⲁⲩⲱ ⲛⲧⲟⲟⲧⲟⲩ ⲛⲛⲉⲧⲙⲟⲥⲧⲉ ⲙⲙⲟⲓ ϫⲉ ⲁⲩⲧⲁϫⲣⲟ ⲉϩⲟⲩⲉ ⲉⲣⲟⲓ</ab>
19ⲁⲩⲱ ⲁⲩⲁϩⲉⲣⲁⲧⲟⲩ ⲉⲣⲟⲓ ⲛϭⲓ ⲛⲉϩⲟⲟⲩ ⲛⲧⲁⲑⲗⲓⲯⲓⲥ ⲁⲩⲱ ⲡϫⲟⲉⲓⲥ ⲁϥϣⲱⲡⲉ ⲛⲁⲓ ⲛⲧⲁϫⲣⲟ</ab>
20ⲁⲩⲱ ⲁϥⲟⲩⲱϣⲥ ⲛⲁⲓ ⲉⲃⲟⲗ ⲁϥⲛⲁϩⲙⲉⲧ ϫⲉ ⲁⲡⲉϥⲟⲩⲱϣ ϣⲱⲡⲉ ⲛϩⲏⲧ</ab>
21ⲁⲩⲱ ⲡϫⲟⲉⲓⲥ ⲁϥⲧⲱⲱⲃⲉ ⲛⲁⲓ ⲕⲁⲧⲁ ⲧⲁⲓⲇⲓⲕⲁⲓⲟⲥⲩⲛⲏ ⲁⲩⲱ ⲕⲁⲧⲁ ⲡⲧⲃⲃⲟ ⲛⲛⲁϭⲓϫ ⲁϥⲧⲱⲱⲃⲉ ⲛⲁⲓ</ab>
22ϫⲉ ⲁⲓϩⲁⲣⲉϩ ⲉⲛⲉϩⲓⲟⲟⲩⲉ ⲙⲡϫⲟⲉⲓⲥ ⲁⲩⲱ ⲙⲡⲓⲣϣⲁϥⲧⲉ ⲉⲡⲁⲛⲟⲩⲧⲉ</ab>
23ϫⲉ ⲛⲉϥϩⲁⲡ ⲧⲏⲣⲟⲩ ⲙⲡⲁⲙⲧⲟ ⲉⲃⲟⲗ ⲁⲩⲱ ⲛⲉϥⲇⲓⲕⲁⲓⲱⲙⲁ ⲙⲡⲓⲥⲁϩⲱⲟⲩ ⲉⲃⲟⲗ ⲙⲙⲟⲓ</ab>
24ⲁⲩⲱ ϯⲛⲁϣⲱⲡⲉ ⲉⲓⲟⲩⲁⲁⲃ ⲛⲁϩⲣⲁϥ ⲁⲩⲱ ϯⲛⲁϩⲟⲣⲧ ⲉⲣⲟⲓ ⲉⲧⲁⲁⲛⲟⲙⲓⲁ</ab>
25ⲁⲩⲱ ⲡϫⲟⲉⲓⲥ ⲛⲁⲧⲱⲱⲃⲉ ⲛⲁⲓ ⲕⲁⲧⲁ ⲧⲁⲇⲓⲕⲁⲓⲟⲥⲩⲛⲏ ⲁⲩⲱ ⲕⲁⲧⲁ ⲡⲧⲃⲃⲟ ⲛⲛⲁϭⲓϫ ϥⲛⲁⲧⲱⲱⲃⲉ ⲛⲁⲓ ⲙⲡⲙⲧⲟ ⲉⲃⲟⲗ ⲛⲛⲉϥⲃⲁⲗ</ab>
26ⲉⲕϣⲁⲛϣⲱⲡⲉ ⲙⲛ ⲟⲩⲁ ⲉϥⲟⲩⲁⲁⲃ ⲕⲛⲁϣⲱⲡⲉ ⲉⲕⲟⲩⲁⲁⲃ ⲁⲩⲱ ⲉⲕϣⲁⲛϣⲱⲡⲉ ⲙⲛ ⲟⲩⲧⲉⲗⲓⲟⲥ ⲕⲛⲁϣⲱⲡⲉ ⲉⲕⲟ ⲛⲧⲉⲗⲓⲟⲥ</ab>
27ⲁⲩⲱ ⲉⲕϣⲁⲛϣⲱⲡⲉ ⲙⲛ ⲟⲩⲥⲱⲧⲡ ⲕⲛⲁϣⲱⲡⲉ ⲉⲕⲟ ⲛⲥⲱⲧⲡ ⲁⲩⲱ ⲉⲕϣⲁⲛϣⲱⲡⲉ ⲙⲛ ⲡⲉⲧϭⲟⲟⲙⲉ ⲕⲛⲁϣⲱⲡⲉ ⲉⲕϭⲟⲟⲙⲉ</ab>
28ⲁⲩⲱ ⲡⲗⲁⲟⲥ ⲛϩⲏⲕⲉ ⲉⲕⲛⲁⲛⲁϩⲙⲉϥ ⲁⲩⲱ ⲛⲃⲁⲗ ⲛⲛⲉϫⲁⲥⲓϩⲏⲧ ⲕⲛⲁⲑⲃⲃⲓⲟⲟⲩ</ab>
29ϫⲉ ⲛⲧⲟⲕ ⲡⲉ ⲡⲁϩⲏⲃⲥ ⲡϫⲟⲉⲓⲥ ⲁⲩⲱ ⲛⲧⲟⲕ ⲡⲉⲧⲛⲁⲧⲣⲉⲡⲁⲕⲁⲕⲉ ⲉⲣⲟⲩⲟⲉⲓⲛ ⲛⲁϩⲣⲁⲓ</ab>
30ϫⲉ ⲉⲓⲛⲁⲡⲱⲧ ϩⲣⲁⲓ ⲛϩⲏⲧⲕ ⲉⲓⲧⲟⲩϫⲏⲩ ⲁⲩⲱ ⲉⲓⲛⲁⲟⲩⲱⲧⲃ ⲛⲟⲩⲥⲟⲃⲧ ϩⲙ ⲡⲁⲛⲟⲩⲧⲉ</ab>
31ⲡⲁⲛⲟⲩⲧⲉ ⲉⲧⲧⲁϫⲣⲏⲟⲩⲧ ⲧⲉϥϩⲓⲏ ⲟⲩⲁⲁⲃ ⲡϣⲁϫⲉ ⲙⲡϫⲟⲉⲓⲥ ϫⲟⲟⲣ ⲉϥⲡⲟⲥⲉ ⲧⲛⲁϣⲧⲉ ⲡⲉ ⲛⲟⲩⲟⲛ ⲛⲓⲙ ⲉⲧⲕⲱ ⲛϩⲧⲏⲩ ⲉⲣⲟϥ</ab>
32ⲛⲓⲙ ⲡⲉ ⲡϫⲱⲱⲣⲉ ⲛⲥⲁ ⲡϫⲟⲉⲓⲥ ⲁⲩⲱ ⲛⲓⲙ ⲡⲉⲧⲛⲁⲣⲣⲉϥⲥⲱⲛⲧ ⲛⲥⲁ ⲡⲉⲛⲛⲟⲩⲧⲉ</ab>
33ⲡϫⲟⲉⲓⲥ ⲉⲧⲧⲁϫⲣⲟ ⲙⲙⲟⲓ ϩⲛ ⲟⲩϭⲟⲙ ⲁⲩⲱ ⲁϥⲥⲟⲩⲧⲛ ⲧⲁϩⲓⲏ ⲉⲥⲟⲩⲁⲁⲃ</ab>
34ⲉϥⲉⲥⲟⲃⲧⲉ ⲛⲛⲁⲟⲩⲉⲣⲏⲧⲉ ⲛⲑⲉ ⲛⲟⲩⲓⲟⲩⲗ ⲁⲩⲱ ⲉϥⲧⲁϩⲟ ⲙⲙⲟⲓ ⲉⲣⲁⲧ ⲉϫⲛ ⲛⲙⲁ ⲉⲧϫⲟⲥⲉ</ab>
35ⲉϥⲧⲥⲁⲃⲟ ⲛⲛⲁϭⲓϫ ⲉⲡⲡⲟⲗⲉⲙⲟⲥ ⲉⲁϥⲕⲱ ⲛⲟⲩⲡⲓⲧⲉ ⲛϩⲟⲙⲛⲧ ϩⲛ ⲛⲁϭⲃⲟⲓ</ab>
36ⲁⲩⲱ ⲁⲕϯ ⲛⲁⲓ ⲛⲧⲛⲁϣⲧⲉ ⲙⲡⲁⲟⲩϫⲁⲓ ⲁⲩⲱ ⲡⲉⲕⲥⲱⲧⲙ ⲉⲣⲟⲓ ⲁϥⲧⲟⲩϫⲁⲓ</ab>
37ⲁⲕⲟⲩⲱϣⲥ ⲉⲃⲟⲗ ⲛⲛⲁⲧⲁϭⲥⲉ ϩⲁⲣⲁⲧ ⲁⲩⲱ ⲛⲁⲟⲩⲉⲣⲏⲧⲉ ⲙⲡⲟⲩϣⲧⲟⲣⲧⲣ</ab>
38ϯⲛⲁⲡⲱⲧ ⲛⲥⲁ ⲛⲁϫⲁϫⲉ ⲛⲧⲁⲧⲁⲕⲟ ⲙⲙⲟⲟⲩ ⲁⲩⲱ ⲛϯⲛⲁⲕⲧⲟ ⲙⲙⲟⲓ ⲁⲛ ϣⲁⲛϯⲟϫⲛⲟⲩ</ab>
39ϯⲛⲁⲗⲟϫⲟⲩ ⲛⲥⲉⲧⲙⲉϣⲧⲱⲟⲩⲛ ⲁⲩⲱ ⲥⲉⲛⲁϩⲉ ϩⲁ ⲛⲁⲟⲩⲉⲣⲏⲧⲉ</ab>
40ⲁⲩⲱ ⲕⲛⲁⲧⲁϫⲣⲟⲓ ϩⲛ ⲟⲩϭⲟⲙ ⲉⲡⲡⲟⲗⲉⲙⲟⲥ ⲁⲩⲱ ⲕⲛⲁⲕⲱⲗϫ ϩⲁⲣⲁⲧ ⲛⲛⲉⲛⲧⲁⲩⲧⲱⲟⲩⲛ ⲉϩⲣⲁⲓ ⲉϫⲱⲓ</ab>
41ⲁⲩⲱ ⲛⲁϫⲁϫⲉ ⲁⲩⲧⲁⲁⲩ ⲉⲩⲑⲃⲃⲓⲏⲩ ⲛⲁϩⲣⲁⲓ ⲛⲕⲟⲟⲩⲉ ⲉⲧⲙⲟⲥⲧⲉ ⲙⲙⲟⲓ ⲁⲕⲙⲟⲩⲟⲩⲧ ⲙⲙⲟⲟⲩ</ab>
42ⲥⲉⲛⲁⲱϣ ⲉⲃⲟⲗ ⲛⲧⲉⲧⲙⲃⲟⲏⲑⲓⲁ ϣⲱⲡⲉ ⲛⲁⲩ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲁⲩⲱ ⲙⲡⲉϥⲥⲱⲧⲙ ⲉⲣⲟⲟⲩ</ab>
43ⲁⲓϣⲁϣⲟⲩ ⲛⲑⲉ ⲛⲟⲩⲕⲁϩ ⲛⲧⲉ ⲡⲕⲁϩ ⲛⲑⲉ ⲙⲡⲟⲙⲉ ⲛⲛⲉϩⲓⲟⲟⲩⲉ ⲁⲓϫⲟⲟⲣⲟⲩ ⲉⲃⲟⲗ</ab>
44ⲕⲛⲁⲛⲁϩⲙⲉⲧ ⲉⲡϣⲁⲛⲧ ⲛⲧⲉ ⲛⲗⲁⲟⲥ ⲕⲛⲁϩⲁⲣⲉϩ ⲉⲣⲟⲓ ⲉⲁⲁⲧ ⲛⲁⲡⲉ ⲉϫⲛ ⲛⲗⲁⲟⲥ ⲙⲛ ⲛϩⲉⲑⲛⲟⲥ ⲡⲗⲁⲟⲥ ⲉⲧⲙⲡⲓⲥⲟⲩⲱⲛϥ ⲁϥⲣϩⲙϩⲁⲗ ⲛⲁⲓ</ab>
45ⲁⲩⲥⲱⲧⲙ ⲉⲣⲟⲓ ⲁⲩⲕⲉⲛⲉⲩⲙⲁⲁϫⲉ ⲉⲣⲟⲓ ϩⲉⲛϣⲏⲣⲉ ⲛϣⲙⲙⲟ ⲁⲩϫⲓϭⲟⲗ ⲉⲣⲟⲓ</ab>
46ϩⲛϣⲏⲣⲉ ⲛϣⲙⲙⲟ ⲥⲉⲛⲁⲛⲟϫⲟⲩ ⲃⲟⲗ ⲁⲩⲱ ⲥⲉⲛⲁⲣϭⲱⲃ ⲉⲃⲟⲗ ϩⲛ ⲛⲉⲩⲙⲟⲉⲓⲧ ⲙⲙⲟⲟϣⲉ</ab>
47ⲡϫⲟⲉⲓⲥ ⲟⲛϩ ⲁⲩⲱ ϥⲉⲙⲁⲙⲁⲁⲧ ⲛϭⲓ ⲡⲉⲧϩⲁⲣⲉϩ ⲉⲣⲟⲓ ⲁⲩⲱ ϥⲛⲁϫⲓⲥⲉ ⲛϭⲓ ⲡⲁⲛⲟⲩⲧⲉ ⲡⲉⲧⲣⲟⲉⲓⲥ ⲉⲡⲁⲟⲩϫⲁⲓ</ab>
48ⲡϫⲟⲉⲓⲥ ⲉϥⲧⲁϫⲣⲏⲩ ⲉϥϯ ⲛⲁⲓ ⲛⲟⲩⲕⲃⲁ ⲉϥϯⲥⲃⲱ ⲛⲛⲉⲗⲁⲟⲥ ⲉⲩϩⲁⲣⲉϩ</ab>
49ⲉϥⲉⲓⲛⲉ ⲙⲙⲟⲓ ⲟⲩⲧⲱⲟⲩ ⲛⲛⲁϫⲁϫⲉ ⲁⲩⲱ ⲕⲛⲁϫⲓ ⲙⲙⲟⲓ ⲟⲩⲧⲱⲟⲩ ⲛⲛⲉⲧⲧⲱⲟⲩⲛ ⲉϩⲣⲁⲓ ⲉϫⲱⲟⲩ ⲛⲧⲟⲕ ⲡⲉⲧⲛⲁⲛⲁϩⲙⲉⲧ ⲛⲧⲟⲟⲧϥ ⲛⲟⲩⲣⲱⲙⲉ ⲛϩⲉⲛϫⲓⲛϭⲟⲛⲥ</ab>
50ⲉⲧⲃⲉ ⲡⲁⲓ ϯⲛⲁⲉⲝⲟⲙⲟⲗⲟⲅⲉⲓ ⲛⲁⲕ ⲡϫⲟⲉⲓⲥ ϩⲛ ⲛϩⲉⲑⲛⲟⲥ ⲁⲩⲱ ϯⲛⲁϣⲁⲗⲗⲉⲓ ⲉⲡⲉⲕⲣⲁⲛ</ab>
51ⲉϥⲧⲁϣⲟ ⲛⲛⲉⲟⲩϫⲁⲓ ⲙⲡⲉϥⲣⲣⲟ ⲁⲩⲱ ⲉϥⲉⲓⲣⲉ ⲛⲟⲩⲛⲁ ⲙⲛ ⲡⲉϥⲭⲣⲓⲥⲧⲟⲥ ⲙⲛ ⲡⲉϥⲥⲡⲉⲣⲙⲁ ⲛϣⲁ ⲉⲛⲉϩ</ab>